Azərbaycan Respublikası Mərkəzi Bankı (MB) İdarə Heyətinin 2010-cu ilin yekunlarına həsr olunmuş geniş iclası keçirilmişdir.
Qurumun bütün struktur bölmələrinin və regional ərazi idarələri rəhbərlərinin iştirak etdiyi iclasda idarə heyətinin sədri Elman Rüstəmov ölkə başçısının Nazirlər Kabinetinin 2010-cu ilin sosial-iqtisadi inkişafının yekunlarına həsr olunmuş geniş iclasında Azərbaycan iqtisadiyyatının qlobal böhrandan uğurla çıxması ilə bağlı fikirlərini xatırlatmışdır. Vurğulamışdır ki, Prezident İlham Əliyev makroiqtisadi sabitliyin iqtisadi inkişafda vacib olduğunu daim qeyd edir və bu sahədə MB-nin, onun pul, məzənnə və maliyyə sabitliyi siyasətinin əhəmiyyətli rolu vardır.
E.Rüstəmov qeyd etmişdir ki, son on ilin inkişaf nəticələrinə görə ölkə iqtisadiyyatı dünya təcrübəsində çox az təsadüf edilən bir kəmiyyət və keyfiyyət inkişafına nail ola bilmişdir. İqtisadi artımın 4 dəfə, ixracın 15 dəfə, valyuta ehtiyatlarının 31 dəfə artması bunun bariz göstəriciləridir. Bu davamlı inkişafa makroiqtisadi sabitlik şəraitində nail olunmuşdur. Bu müddətdə orta illik inflyasiya 7 faiz, manatın məzənnəsinin orta illik dəyişmə sürəti isə 1 faiz təşkil etmişdir. Belə bir mühitdə ölkənin maliyyə sektorunun əsas göstəriciləri 15-20 dəfə artmışdır. MB ölkənin iqtisadi inkişafına və işgüzar infrastrukturuna dəstək verən onlarla strateji layihə həyata keçirmişdir. Bir çox inkişaf institutları yaradılmışdır.
2010-cu ildə MB makroiqtisadi sabitliyi olduqca mürəkkəb qlobal iqtisadi mühitdə qorumuşdur. Makroiqtisadi sabitlik, bank sektorunda maliyyə sabitliyi və iqtisadi artım sahəsində əldə olunmuş nəticələr göstərir ki, MB bu məsuliyyətin öhdəsindən uğurla gələ bilmişdir. Hesabat dövründə Maliyyə Monitorinqi Xidməti sahəsində qanunvericilik təkmilləşdirilmiş, valyuta ehtiyatlarının idarə edilməsində təhlükəsizlik prinsipini əsas götürən konservativ idarəetmə 2010-cu ildə də davam etdirilmişdir. Bank nəzarəti öz fəaliyyətini MB-nin əsas mandatlarından biri olan bank sektorunun sabitliyi və davamlı inkişafının təmin edilməsi istiqamətində qurmuşdur. MB səmərəli bank tənzimləmə institutu statusunu təsdiq etmiş, böhranın öhdəsindən uğurla gəlmiş, sektorun maliyyə sabitliyini və dayanıqlığını qoruyub saxlamışdır.
E.Rüstəmov növbəti strateji dövrdə qurumun qarşısında duran vəzifələri də açıqlamışdır. Cari ildə də makroiqtisadi sabitlik, ilk növbədə qiymətlərin sabitliyi qorunmalıdır. MB bütövlükdə ölkədə qeyri-neft sektorunun inkişafı, iqtisadi diversifikasiya kimi uzunmüddətli strateji bir xəttin həyata keçirilməsində hökumətə dəstək verməlidir. 2011-ci il ərzində bank sektorunda maliyyə sabitliyinin qorunması və idarə olunması, habelə maliyyə sektorunun inkişafının təşviqi potensialının artırılması, nağd pul dövriyyəsinin təşkili və tənzimlənməsinin beynəlxalq standartlaşması təmin edilməlidir. Həmçinin 2011-ci ilin prioritetləri sırasında ödəniş sisteminin arxitekturasının modernləşdirilməsi, elektron hökumət konsepsiyası ilə bağlı hökumət tərəfindən təsdiq olunmuş bütün proqramlara MB-nin fəaliyyətinin daha geniş inteqrasiyası da yer almışdır.
Müzakirələr göstərmişdir ki, Mərkəzi Bank növbəti strateji dövrdə qarşıya qoyduğu məqsədlərə çatmaq üçün bütün imkanlara malikdir və 2011-ci ildə də ölkənin iqtisadi inkişafına öz töhfəsini verəcəkdir.