Cari ilin yanvar-fevral aylarında Azərbaycan ilə Ukrayna arasında əmtəə dövriyyəsi 261,6 milyon dollara bərabər olmuşdur. Bu, keçən ilin müvafiq dövrünün göstəricisi ilə müqayisədə 4 dəfə çoxdur. Ukraynanın Azərbaycandakı diplomatik fəaliyyəti başa çatan səfiri Boris Klimçuk bunu aprelin 22-də keçirilmiş mətbuat konfransında bildirmişdir.
"Bu ilin ilk ayında Azərbaycandan Ukraynaya ixracın həcmi 180 milyon dollar olmuşdur. Bu, 2009-cu ilin müvafiq dövrünün göstəricisi ilə müqayisədə 22 dəfə çoxdur" - deyən diplomat vurğulamışdır ki, Azərbaycandan ixracın strukturunda "Azeri Light" markalı Azərbaycan nefti üstünlük təşkil edir.
B.Klimçuk Azərbaycan Respublikası Dövlət Neft Şirkətinin Ukraynada fəaliyyətini yüksək qiymətləndirərək qeyd etmişdir ki, şirkət Ukraynada özünün yanacaqdoldurma stansiyaları şəbəkəsini yaratmaqla və orada öz ofisini açmaqla Ukrayna iqtisadiyyatına uğurla inteqrasiya edir.
Diplomat daha sonra demişdir ki, Azərbaycan və Ukrayna nəqliyyat sahəsində əməkdaşlığı fəal inkişaf etdirirlər. O demişdir: "Boqdan" firması "Avro-2012" avtobuslarının yeni xəttini açmış, Azərbaycanın Nəqliyyat Nazirliyi isə həmin avtobusların Azərbaycana göndərilməsi təklifini bəyənmişdir. Zənnimcə, bu avtobuslar həm öz keyfiyyətinə, həm də qiymətinə görə rəqabətədavamlı olacaqlar".
B.Klimçuk qeyd etmişdir ki, "Boqdan" avtobusları Volınsk vilayətində istehsal edilir. Buna görə də sabiq səfir həmin vilayətin qubernatoru vəzifəsində fəaliyyətə başlayandan sonra bu layihənin sürətləndirilməsi ilə məşğul olacaqdır.
Diplomat demişdir: "Azərbaycanda diplomatik fəaliyyətim dövründə başladığım bir sıra layihələr hələ tamamlanmamışdır. Buna görə də mən Volınsk vilayətinin qubernatoru vəzifəsində həmin layihələrin çoxunun həyata keçirilməsinə nəzarət edəcəyəm".
B.Klimçuk bildirmişdir ki, bu il sentyabrın axırlarında o, artıq Volınsk vilayətinin qubernatoru vəzifəsində Gəncədə biznes əlaqələri yaratmaq üçün özünün başçılıq etdiyi böyük nümayəndə heyəti ilə birlikdə Gəncəyə səfər edəcəkdir.
AzərTAc{nl}