Azərbaycan Respublikasının Mərkəzi Bankı pul və məzənnə siyasəti çərçivəsinin təkmilləşdirilməsi istiqamətində ardıcıl tədbirlərini davam etdirir.
Bankın mətbuat xidmətindən verilən məlumata görə, bu məqsədlə manatın məzənnəsinin hədəflənməsinin müxtəlif variantları nəzərdən keçirilmişdir. Makroiqtisadi təhlillər göstərir ki, ABŞ dolları/manat ikitərəfli məzənnəsinin hədəflənməsi hazırkı şəraitdə Mərkəzi Bankın məqsədləri, xüsusən də inflyasiya səviyyəsinə təsir göstərmək hədəfi ilə daha çox uzlaşır. Kommunikasiya baxımından əlverişli olmaqla yanaşı, bu mexanizm həm də Mərkəzi Bankın uzunmüddətli perspektivdə sərbəst üzən məzənnə rejiminə keçmək imkanlarını artırır.
Məlum olduğu kimi, 2008-ci ilin mart ayından etibarən Mərkəzi Bank özünün məzənnə siyasətini avro və ABŞ dollarının daxil olduğu bivalyuta səbəti dəyərinin hədəflənməsi vasitəsilə həyata keçirmişdir. Ötən müddət ərzində bu mexanizm qlobal valyuta bazarındakı prosesləri yerli məzənnələrə sirayət etdirməklə manatın çoxtərəfli məzənnəsinə nəzarət imkanlarını artırmışdı. Lakin son vaxtlar aparıcı valyutaların məzənnələrindəki volatilliyin daha da kəskinləşməsi, inkişaf etməkdə olan ölkələr tərəfindən milli valyutaların qarşılıqlı dəyərsizləşdirilməsi və maliyyə sabitliyi hədəfinin prioritetliyi ilə səciyyələnən yeni şərait məzənnə siyasətinin taktikasına dəyişiklik etmək zərurəti yaratmışdır.
Qeyd olunanları nəzərə alaraq Mərkəzi Bankın İdarə Heyəti məzənnə siyasətinin tətbiqi mexanizminin təkmilləşdirilməsi çərçivəsində 2011-ci il yanvarın 10-dan ABŞ dolları/manat ikitərəfli məzənnəsinin hədəflənməsinə keçidlə əlaqədar qərar qəbul etmişdir.{nl}