Azərbaycanın neft sənayesinə ən müasir qazma texnologiyaları gətirən SOCAR-AQŞ MMC Xəzər dənizinin milli sektorunda yeni neft və qaz quyularının qazılmasını uğurla davam etdirir.

Xatırladaq ki, inteqrə olunmuş qazma və quyu xidmətləri göstərən SOCAR-AQŞ birgə müəssisəsi SOCAR və Abşeron Qazma Şirkəti tərəfindən 2007-ci ildə təsis edilib. Müəssisənin əsas fəaliyyəti quyuların layihələndirilməsi və planlaşdırılması, neft və qaz quyularının müxtəlif üsullarla qazılması, mənimsənilməsi, quyuların əsaslı təmiri, eləcə də çoxşaxəli quyuların qazılması ilə bağlı iş və xidmətlərin təqdim edilməsindən ibarətdir. Hazırda SOCAR-AQŞ “Günəşli” yatağının dayaz sulu hissəsində yerləşən  7 və 11 saylı, “Qərbi Abşeron” yatağının 20 saylı, “Ümid’’ yatağının 1 saylı və  “Bulla’’ yatağında  6 saylı dərin dəniz stasionar özüllərində  qazma işləri aparır.

Bu günlərdə SOCAR-AQŞ “Qərbi Abşeron” yatağının dayaz sulu hissəsindəki 20 saylı stasionar dəniz özülündən daha bir quyunun tikintisini uğurla başa çatdırıb. Müəssisədən verilən məlumata görə, faktiki dərinliyi 756 metr olan 31 saylı quyunun tikinti işləri təhlükəsiz, ətraf mühitə heç bir ziyan vurulmadan vaxtından əvvəl uğurla yekunlaşdırılıb.  Xatırladaq ki, sözügedən quyuda qazma işlərinə bu il martın 13-də başlanılmışdı.

Aprel ayının ilk günlərində qazmaçılar “Günəşli” yatağının dayaz sulu hissəsindəki 7 saylı stasionar dəniz özülündən faktiki dərinliyi 2850 metr olan 317 saylı quyunun tikintisini də təhlükəsiz və ətraf mühitə heç bir ziyan vurmadan uğurla yekunlaşdırıblar.

 M. YAQUBZADƏ,
“Xalq qəzeti”