Mərkəzi Bankın sədri Elman Rüstəmov Avropa Yenidənqurma və İnkişaf Bankının (AYİB) prezidenti Tomas Mirounun başçılıq etdiyi nümayəndə heyəti ilə görüşmüşdür.

Görüşdə postböhran dövründə Azərbaycanda makroiqtisadi siyasətin əsas prioritetləri, maliyyə sisteminin dayanıqlığının təmin edilməsi istiqamətində Mərkəzi Bankın hədəfləri və bu hədəflərə nail olmaq məqsədi ilə tətbiq edilməsi səmərəli sayılan taktiki alətlərdən istifadə yolları müzakirə edilmişdir.

AYİB prezidenti  Azərbaycan Respublikası ilə əlaqələrin səviyyəsindən məmnunluğunu bildirmiş və ölkəmizdə icra olunan proqramların yüksələn xətlə davam etdirilməsinin zəruriliyini vurğulamışdır. T.Mirou təmsil etdiyi qurumun Azərbaycanın maliyyə-bank sektorunda fəaliyyətini yüksək qiymətləndirmiş və bu sahədə dəstəyinə görə Mərkəzi Bankın sədrinə minnətdarlığını bildirmişdir.

Görüşdə, həmçinin Mərkəzi Bank ilə AYİB arasında gələcək qarşılıqlı əməkdaşlıq məsələləri müzakirə olunmuşdur. 

AzərTAc