Dekabrın 24-də Maliyyə Nazirliyinin Dövlət Xəzinədarlığı Agentliyinin 1 saylı Xəzinədarlıq İdarəsinin inzibati binasının açılış mərasimi olmuşdur.
Maliyyə Nazirliyinin mətbuat xidmətindən AzərTAc-a bildirmişlər ki, mərasimdə iştirak edən nazir Samir Şərifov binanın açılışını bildirən lenti kəsərək inzibati bina və burada yaradılmış iş şəraiti ilə tanış olmuşdur.
Bildirilmişdir ki, müasir standartlara uyğun təmir edilən inzibati binada normal iş fəaliyyəti üçün hər cür şərait yaradılmışdır. Binada bütün otaqlar kompyuter və ən müasir zəruri avadanlıqla təmin edilmişdir, Bütün bunlar büdcə təşkilatlarına göstərilən xəzinə xidmətinin keyfiyyətini və operativliyini artırır.
Qeyd olunmuşdur ki, 1 saylı Xəzinədarlıq İdarəsi Dövlət Xəzinədarlığı Agentliyinin ən böyük idarələrindən biri olaraq yüzə yaxın iri büdcə təşkilatlarına xidmət göstərir. İdarənin xəzinə xidməti göstərdiyi büdcə təşkilatlarının xərcləri dövlət büdcəsinin 80-85 faizini təşkil edir. Agentliyin 2,5 və 10 saylı xəzinədarlıq idarələri üçün də yeni inzibati binaların tikintisi üçün lazımi tədbirlər həyata keçirilir.
Mərasimdə maliyyə naziri S.Şərifov çıxış edərək bildirmişdir ki, Prezident İlham Əliyevin rəhbərliyi altında uğurla həyata keçirilən iqtisadi siyasət nəticəsində Azərbaycan inkişaf edir və qüdrətlənir. Ölkə miqyasında həyata keçirilən tikinti-quruculuq işləri bütün sahələri əhatə edir. Son illərdə Maliyyə Nazirliyi əməkdaşlarının iş şəraitinin yaxşılaşdırılması, eyni zamanda, nazirliyin tabeliyində olan qurumların müstəqil inzibati binalarla təmin olunması istiqamətində ciddi işlər görülür.
Kollektivi yeni inzibati binanın istifadəyə verilməsi münasibəti ilə təbrik edən S.Şərifov əmin olduğunu bildirmişdir ki, idarənin əməkdaşları qarşıya qoyulan vəzifələri daha yüksək səviyyədə həyata keçirəcəklər.