Azərbaycan iqtisadiyyatı son illər sürətlə inkişaf etmişdir. İndi ölkəmizin təkcə neft sektoru deyil, qeyri-neft sektoruna da əsaslı sərmayə qoyulur. Azərbaycanın iqtisadi sahədə əldə etdiyi uğurlar digər ölkələr üçün də nümunə ola bilər.
Bu sözlər ölkəmizdə səfərdə olan İndoneziya Parlamenti Nümayəndələr Palatasının sədr müavini Pramono Anunq Vibovonun rəhbərlik etdiyi nümayəndə heyətinin Milli Məclisin iqtisadi siyasət komitəsinin üzvləri ilə görüşündə səslənmişdir.
Komitə sədri Ziyad Səmədzadə qonaqlara Azərbaycanda iqtisadi sahədə həyata keçirilən islahatlar, bu sahə ilə bağlı qəbul olunmuş qanunlar barədə ətraflı məlumat vermişdir. O demişdir ki, öz iqtisadi potensialına görə, dünyada öncüllər sırasına çıxan Azərbaycan regionda lider dövlətdir. Bu uğurların əsasında ölkənin müvəffəqiyyətlə həyata keçirilən neft strategiyası dayanır.
Z.Səmədzadə İndoneziyanın iqtisadi sahədə əldə etdiyi nailiyyətlərin də təqdirəlayiq olduğunu vurğulamış, ölkələrimiz arasında iqtisadi-ticarət dövriyyəsinin artırılmasının vacibliyini qeyd etmişdir.
Pramono Anunq Vibovo İndoneziyada iqtisadi sahədə həyata keçirilən islahatlar, ölkəsinin təbii ehtiyatları və bu ehtiyatlardan səmərəli istifadə edilməsi ilə bağlı ətraflı məlumat vermişdir. Qonaq ölkələrimizin oxşar iqtisadiyyata malik olduğunu bildirmiş, bu və digər sahələrdə əlaqələrin genişləndirilməsinin vacibliyini qeyd etmişdir.
Söhbət zamanı ölkələrimiz arasında iqtisadi, ticarət, humanitar sahələrdə əlaqələrin genişləndirilməsi, qanunvericilik sahəsində əməkdaşlıq, ticarət dövriyyəsinin artırılması və digər məsələlər ətrafında fikir mübadiləsi aparılmışdır.
Görüşdə Azərbaycanın İndoneziyadakı səfiri İbrahim Hacıyev iştirak etmişdir.
AzərTAc{nl}