Azərbaycan Dövlət Neft Şirkətinin (SOCAR)  “Azneft” İstehsalat Birliyi üzrə çıxarılan neftin yarısından çoxunu verən “Günəşli” yatağında hasilatın sabit saxlanmsı istiqamətində tədbirlər davam etdirilir. Bu məqsədlə sözügedən yataqda yeni stasionar dərin dəniz özülləri quraşdırılır, əlavə neft quyuları qazılır.

“Azneft” İstehsalat Birliyinin sifarişi ilə yaxın vaxtlarda Günəşli” yatağında istismar olunan quyularda lay təzyiqinin sabit saxlanılması məqsədilə iki ədəd yeni nasos stansiyasının inşası nəzərdə tutulur. Xatırladaq ki,  “Neftqazelmitədqiqatlayihə” İnstitutunun layihəsi əsasında tikiləcək nasos stansiyalarının  baş podratçısı “Neftqaztikinti” Trestidir. Yataqdakı 6 və 9 saylı dərin dəniz özüllərində yerləşdiriləcək nasos stansiyalarının su tələbatına uyğun yeni dalma nasosları, soyutma və drenaj, nəzarət-ölçü cihazları və avtomatika mexanizmləri quraşdırılacaq, stansiyalar yanğınsöndürmə sistemləri və qaldırıcılarla təchiz olunacaq.  Özüllərdəki mövcud operator otaqları yenilənəcək, boru xətlərinin üzərində keçid meydançaları inşa ediləcək. İnşaat işləri zamanı ətraf mühitin mühafizəsi bütün müasir norma və tələblərə uyğun şəkildə təmin ediləcək.

Yeri gəlmişkən, 6 və 9 saylı stasionar dərin dəniz özüllərində quraşdırılacaq nasos stansiyalarının gündəlik suvurma gücü müvafiq olaraq 5 min  kubmetr və 9500 kubmetr təşkil edəcək.     

M.YAQUBZADƏ,
“Xalq qəzeti”