Azərbaycanın Müdafiə Sənayesi Nazirliyi (MSN) Prezident İlham Əliyevin diqqət və qayğısı nəticəsində çox sürətlə inkişaf etmişdir.
Bu sözləri müdafiə sənayesi naziri Yavər Camalov dekabrın 17-də jurnalistlərə müsahibəsində demişdir.
Nazir bildirmişdir ki, Müdafiə Sənayesi Nazirliyi artıq beş ildir ki, fəaliyyət göstərir. Nazirlik yarandıqdan sonra qarşıya qoyulan ilk vəzifə sovetlər dövründən qalan müəssisələrin bərpası və yenidən qurulması, onların bazasında müdafiə təyinatlı məhsulların istehsalı olmuşdur. Nazirliyin tərkibindəki zavodlar yenidən qurulmuş və 31 istehsal sahəsi yaradılmışdır. Hazırda bu sahələrdə müxtəlif növ məhsullar istehsal olunur. Gələcəkdə yaradılacaq istehsal sahələrində də yeni məhsulların istehsalı həyata keçiriləcəkdir.
Y.Camalov müdafiə sənayesi sahəsinin son illərdə sürətlə inkişaf etdiyini vurğulayaraq demişdir ki, 2006-cı illə müqayisədə 2010-cu ildə müdafiə təyinatlı məhsulların istehsalı 115 dəfə, keçən illə müqayisədə isə 3,6 dəfə artmışdır.
Diqqətə çatdırılmışdır ki, Prezident İlham Əliyevin tapşırığı ilə nazirlik 2009-cu ildən başlayaraq beynəlxalq sərgilərdə iştirak edir. Bu sərgilərdə MSN-in istehsalı olan müxtəlif məhsullar nümayiş etdirilir. Bu məhsullarımızın çeşidləri ilbəil artmaqdadır. Bütün bu sərgilərdə iştirakımız beynəlxalq aləmdə Azərbaycan müdafiə sənayesinin inkişafını göstərir. Sərgilərdə müxtəlif ölkələrin şirkətləri ilə əlaqələr qurulmuş, niyyət protokolları imzalanmışdır. Sərgilərdə, həmçinin MSN dünyadakı müasir texnikalarla, onların istehsalı ilə tanış olur və həmin texnologiyaların Azərbaycana gətirilməsi istiqamətində işlər görülür. Bütün bunların nəticəsidir ki, Azərbaycanın istehsal sahələrindəki texnogiyalar və avadanlıq dünya standartlarına cavab verir.
MSN ölkənin müdafiə qüdrətinin gücləndirilməsi üçün hazırda yeni layihələrin həyata keçirilməsi istiqamətində işləyir.{nl}