Ucuz neft dövrü başa çatmaq üzrədir. APA-nın TASS agentliyinə istinadən verdiyi xəbərə görə, bunu ­ OPEC-in baş katibi Məhəmməd Barkindo bəyan edib.

 Baş katib qeyd edib ki, biz son 60 ildə neft qiymətlərinin ən ucuz dövrünün şahidi olduq. Bu dövr hazırda davam etsə də, başa çatmaq üzrədir. Onun sözlərinə görə, neft hasilatı ilə məşğul olan ölkələrin hamısı qiymətlərin aşağı düşməsinin mənfi təsirini hiss ediblər.

 OPEC-in baş katibi Məhəmməd Barkindonun Karakasda ­Venesuela Prezidenti Nikolas Maduro ilə görüşündə də neftin qiyməti məsələsi müzakirə olunub.

Xatırladaq ki, sentyabrın 28-də OPEC-ə üzv ölkələrin Əlcəzairdə keçirilən qeyri-rəsmi görüşündə neft hasilatının həcminin azaldılması barədə ümumi razılıq əldə olunub. Razılaşmaya əsasən, kartelə üzv ölkələr gündəlik neft hasilatını 32,5-33 milyon barrel həcminə salınmasına qərar veriblər. Yekun qərarın isə noyabrın 30-da Vyanada keçiriləcək rəsmi görüşdə veriləcəyi gözlənilir.