2016-cı ilin yanvar-sentyabr ayları ərzində Avropa-Qafqaz-Asiya nəqliyyat dəhlizinin Azərbaycan hissəsində daşınmış yüklərin həcmi 37 milyon 154,5 min ton, yük dövriyyəsi isə 7289,0 milyon ton-km olmuşdur.

Dövlət Statistika Komitəsindən verilən məlumatda bildirilir ki, yüklərin 23 milyon 496,1 min tonu və ya 63,2 faizi avtomobil nəqliyyatı, 10 milyon 214,2 min tonu və ya 27,5 faizi dəmir yolu nəqliyyatı, 3 milyon 444,2 min tonu və ya 9,3 faizi dəniz nəqliyyatı ilə daşınmışdır.

2015-ci ilin müvafiq dövrü ilə müqayisədə dəhliz vasitəsilə daşınmış yüklərin həcmində 5,4 faiz azalma müşahidə edilmişdir. Bunun əsas səbəbi dəmir yolu və dəniz nəqliyyatı ilə yük daşınmasındakı azalmalar (müvafiq olaraq 12,7 faiz və 27,1 faiz) olmuşdur. Qeyd olunan dövrdə avtomobil nəqliyyatı ilə daşınmış yüklərin həcmi 2,8 faiz artmışdır.

Dəhliz vasitəsilə daşınmış yüklərin 14,9 faizini və ya 5 milyon 518,4 min tonunu tranzit yüklər təşkil etmişdir.

2016-cı ilin yanvar-sentyabr aylarında dəhliz vasitəsilə 253,3 milyon sərnişin daşınmış, sərnişin dövriyyəsi 5085,9 milyon sərnişin-km olmuşdur. 2015-ci ilin müvafiq dövrü ilə müqayisədə daşınmış sərnişinlərin sayı 2,4 faiz, sərnişin dövriyyəsi isə 1,6 faiz artmışdır.

Samirə Əliyeva,
“Xalq qəzeti”