Auditorlar Palatasının sədri Vahid Novruzovun rəhbərliyi ilə nümayəndə heyəti Moskva şəhərində Rusiya Auditorlar Palatasının 15 illiyinə həsr olunmuş yubiley tədbirində iştirak etmişdir.
Auditorlar Palatasının mətbuat xidmətindən AzərTAc-a verilən məlumata görə, tədbirlər çərçivəsində Rusiya Auditorlar Palatasının müraciəti əsasında həmin qurum ilə Azərbaycan Respublikasının Auditorlar Palatası arasında əməkdaşlıq sazişi də imzalanmışdır.
Sənəddə Azərbaycan və Rusiya auditorları arasında peşəkar mübadilələrin aparılması üçün daha əlverişli şəraitin yaradılması, audit və mühasibat uçotu sahəsində qanunvericilik və normativ sənədlərin layihələri üzərində birgə tədqiqatların aparılması və informasiya mübadiləsi, bu məqsədlə zəruri hallarda işçi qruplarının yaradılması, müştərək tədbirlərin həyata keçirilməsi və beynəlxalq fəaliyyətdə qarşılıqlı dəstək göstərilməsi, habelə digər məsələlər nəzərdə tutulmuşdur.
Nümayəndə heyətinin çıxışlarında və müsahibələrində ölkəmizdə həyata keçirilən iqtisadi islahatlar, korrupsiyaya qarşı mübarizə və şəffaflığın artırılması istiqamətində Azərbaycan Prezidenti İlham Əliyevin rəhbərliyi ilə həyata keçirilən kompleks tədbirlər barədə ətraflı məlumat verilmişdir.{nl}