Milli Məclis "Torpaqların dövlət ehtiyacları üçün alınması haqqında" qanun layihəsini üçüncü oxunuşda qəbul etmişdir.
Milli Məclisin aqrar siyasət komitəsinin sədri Eldar İbrahimov demişdir ki, deputatların layihənin ikinci oxunuşda müzakirəsi zamanı səsləndirdikləri təkliflərin bəziləri layihədə əksini tapmışdır. Qanun layihəsinə 21 yeni maddə əlavə edilmişdir.
Qanun torpaqların dövlət ehtiyacları üçün alınması, bununla bağlı kompensasiyanın məbləğinin hesablanması və ödənilməsi qaydalarını, habelə bu sahədə tərəflər arasında yaranan digər münasibətləri tənzimləyəcəkdir.
Layihədə deyilir ki, istifadədə, icarədə olmasından və torpaq sahəsindən istifadəyə dair müəyyən edilmiş məhdudiyyətlərdən asılı olmayaraq xüsusi, bələdiyyə və üzərində istifadə və icarə hüquqları olan dövlət mülkiyyətindəki torpaqlar dövlət ehtiyacları üçün alına bilər. Həmin torpaqlar dövlət əhəmiyyətli yolların və digər kommunikasiya xətlərinin çəkilməsi, quraşdırılması, sərhədboyu zolaqda dövlət sərhədinin etibarlı mühafizəsinin təmin edilməsi, müdafiə və təhlükəsizlik, həmçinin dövlət əhəmiyyətli dağ-mədən sənayesi obyektlərinin tikilməsi üçün alına bilər.
AzərTAc{nl}