“Azneft” İstehsalat Birliyinin qabaqcıl müəssisələrindən olan “Neft Daşları” Neft və Qazçıxarma İdarəsi son illər neft-qaz hasilatı və təhvili üzrə qarşıya qoyulmuş tapşırıqları artıqlaması ilə yerinə yetirərək cari ilin sentyabr ayından etibarən son illərin ən yüksək hasilat göstəricinə nail olmuşdur.

SOCAR-dan verilən məlumatda bildirilir ki,  NQÇİ-də 2010-cu ildə gündəlik neft hasilatı 2478 ton, 2011-ci ildə 2537 ton, 2012-ci ildə 2539 ton, 2013-cü ildə 2526 ton, 2014-cü ildə 2575 ton, 2015-ci ildə isə 2579 ton təşkil etmişdir. Cari il sentyabr ayının sonlarından etibarən sutkalıq neft hasilatı 2800 tona çatdırılmışdır. 2010-cu ildə illik neft hasilatı 600443 ton olduğu halda, 2016-cı ilin 8 ayında bu göstərici 657721 ton təşkil etmişdir. Hasilatın artmasına təsir etmiş başlıca amillərdən biri quyu fondunun yenilənməsi, davamlı olaraq yeni quyuların qazılaraq istismara verilməsi olmuşdur.

Belə ki, 2011-ci ildə qazmadan 17 quyu, 2012-ci ildə 9 quyu, 2013-cü ildə 10 quyu, 2014-cü ildə 18 quyu və 2015-ci ildə 18 quyu istismara daxil edilmişdisə, təkcə bu ilin 8 ayında 14 quyu qazılaraq mədənçilərə təhvil verilmiş, onlardan 23009 ton neft alınmışdır. İdarənin balansındakı quyu fondu üzərində aparılan texniki və geoloji tədbirlər də hasilatın artımına təsir etmişdir. İdarədə yeni texnika və texnologiyanın tətbiqinə geniş yer verilir.

Bu ilin 8 ayında 25 quyuda quyudibi zona turşu ilə işlənilmiş, 60 quyuda tıxac təmizləyən qurğu, 2 quyuda isə Padus-2 parafin kəsici qurğu tətbiq olunmuş, nəticədə əlavə 1193 ton neft alınmışdır.

Samirə Əliyeva,
“Xalq qəzeti”