Azərbaycan Respublikası Dövlət Neft Şirkətinin (SOCAR) "Neftqaztikinti" Tresti "Günəşli" yatağındakı 14 saylı dərin dəniz özülündə əlavə iki quyunun qazılması məqsədilə yenidənqurma işlərini uğurla davam etdirir. Adıçəkilən özüldə yenidənqurma işləri SOCAR-ın "Azneft" İstehsalat Birliyinin sifarişi əsasında həyata keçirilir.

Ötən müddətdə quyuların layihə yerlərinin hazırlanması üçün texnoloji xətlərin marşrutu dəyişdirilmiş, qazma nasoslarının quraşdırılması üçün M2 modulunda nasosxananın yeri hazırlanmışdır. Bununla yanaşı, özüldə qülləaltı postamentin gediş yolları, qazma avadanlıqları, eləcə də birinci quyunun qoruyucu və istiqamətləndirici boruları quraşdırılmışdır. Şaxtaların su altında bərkidilməsi məqsədilə quraşdırılacaq avadanlıqlar da artıq tam hazırdır. Hazırda burada boruların bərkidilməsi işləri yerinə yetirilir. Bundan sonra ikinci quyunun qazılması üçün hazırlıq işləri aparılacaqdır. Birinci quyu üzrə yenidənqurma işlərinin bu ayın sonuna kimi, qazma işlərinin isə noyabr ayında başa çatdırılması nəzərdə tutulur. Birinci quyuda qazma işləri yekunlaşdıqdan sonra ikinci quyunun şaxta borularının endirilməsinə başlanılacaqdır. Hazırda tikinti-quraşdırma işləri qrafikə uyğun davam etdirilir.

Yeri gəlmişkən, "Azneft" İstehsalat Birliyi üzrə hasil edilən illik neftin təqribən 65 faizi dayaz sulu "Günəşli" yatağının payına düşür. Yatağın bu hissəsində istismar işləri birliyin "28 May" adına Neft və Qazçıxarma İdarəsi tərəfindən həyata keçirilir.

M. YAQUBZADƏ,
"Xalq qəzeti"