Dövlət Neft Şirkəti tərəfindən neft hasilatının sabit saxlanması istiqamətində mühüm tədbirlər həyata keçirilir, mədənlərdə mövcud infrastruktur yenidən qurulur. “Azneft” İstehsalat Birliyinin “Abşeronneft” Neft və Qazçıxarma idarəsində də son zamanlar bu baxımdan mühüm tədbirlər görülür, uzun müddət ərzində istismarda olan enerji infrastrukturunun yenilənməsi işləri intensiv şəkildə davam etdirilir.

Hazırda adıçəkilən idarə üzrə mədənlərdə istismar müddətini başa vuran elektrik paylayıcı qurğuların, transformator məntəqələrinin yenilənməsi, müasir tipli avadanlıqlarla təchiz edilməsi prosesi yekunlaşmaq üzrədir. Ötən müddətdə həyata keçirilmiş yenidənqurma işləri çərçivəsində, “Abşeronneft” NQÇİ-nin “Darvin bankası” yatağında sutkalıq neft hasilatı 450 ton olan 12 ədəd stasionar dəniz özülünün elektrik təchizatını təmin edən şimal estakadasında köhnə paylayıcı qurğular yeniləri ilə əvəz olunmuşdur.

İdarənin təmir briqadaları tərəfindən yeni paylayıcı qurğular enerjinin kompensasiyası, elektrik verilişi xətlərindəki itkilərin qarşısının alınması üçün xüsusi bəsləmə yuvası, eləcə də kondesator qurğuları, ötürücü xətlərin elektrik mühafizəsini təmin edən müasir tipli rele-mühafizə cihazları, enerji analizatorları, universal elektrik enerji sayğacları ilə təchiz olunmuşdur. Yeni qurğuların istismarında daxili və xarici işıqlandırma sistemli müasir tipli akkumulyatordan istifadə edilmişdir. Bundan əlavə, əməliyyat cərəyanının sabit, fasiləsiz təminatı məqsədilə qurğuda aşağı gərginlikli akkumulyatorlu qida blokları quraşdırılmışdır.

M. YAQUBZADƏ, “Xalq qəzeti”