Azərbaycanda səfərdə olan Polşa Baş nazirinin müavini və iqtisadiyyat naziri Valdemar Pavlyak noyabrın 24-də xarici işlər naziri Elmar Məmmədyarovla görüşmüşdür.
XİN-in mətbuat xidmətindən bildirmişlər ki, görüşdə Azərbaycan ilə Polşa arasında iqtisadi əməkdaşlığın inkişafı və regional məsələlər müzakirə olunmuşdur.
Nazir E.Məmmədyarov bu əməkdaşlığın genişləndirilməsi üçün böyük potensialın mövcud olduğunu, Xəzər dənizinin enerji resurslarının Avropaya nəqlinin prioritet təşkil etdiyini vurğulamış və bu məsələdə Avropa İttifaqının mövqeyinin mühüm əhəmiyyət kəsb etdiyini bildirmişdir. E.Məmmədyarov Azərbaycanın və Polşanın iş adamları arasında təmasların artırılmasının vacibliyini qeyd etmişdir.
Valdemar Pavlyak Azərbaycanın strateji mövqeyə malik olduğunu vurğulamış, Polşanın da ciddi tərəfdaşlarla əməkdaşlıq etmək istəyində olduğunu qeyd etmişdir. O, ölkələrimiz arasında biznes imkanlarının genişləndirilməsinin mühüm əhəmiyyət kəsb etdiyini bildirmişdir.
Görüşdə qarşılıqlı maraq doğuran məsələlər ətrafında fikir mübadiləsi aparılmışdır.{nl}

AzərTAc