Azərbaycan Respublikasının maliyyə naziri, Asiya İnkişaf Bankının (AİB) Müdirlər Şurasının Azərbaycan tərəfindən üzvü Samir Şərifov qurumun Azərbaycandakı daimi nümayəndəliyinin yeni direktoru Olli Noroyono ilə görüşmüşdür.
Nazirliyin mətbuat xidmətindən verilən məlumata görə, görüşdə bankla Azərbaycan arasında hazırkı əlaqələr, o cümlədən gələcək əməkdaşlıq istiqamətləri üzrə fikir mübadiləsi aparılmışdır.
O.Noroyono bildirmişdir ki, təmsil etdiyi bank Azərbaycanda həm dövlət, həm də özəl sektorda energetika, nəqliyyat, şəhər təsərrüfatı və digər istiqamətləri əhatə edən layihələrin reallaşdırılması istiqamətində fəaliyyət göstərir. O, AİB-in enerji və nəqliyyat sahələrində layihələrin kreditləşdirilməsində maraqlı olduğunu diqqətə çatdırmışdır. Bundan əlavə, bank Azərbaycanda 5 regional texniki yardım layihəsi təqdim etməyə hazırdır. AİB-in Azərbaycandakı nümayəndəliyi ölkə üzrə biznes fəaliyyəti ilə bağlı plan-strategiya hazırlayacaqdır.
AİB ilə Azərbaycan hökuməti arasında əlaqələri yüksək qiymətləndirən S.Şərifov O.Noroyononun daimi nümayəndəliyə rəhbərliyi dövründə AİB ilə Azərbaycan arasındakı əlaqələrin daha da inkişaf edəcəyinə ümidvar olduğunu söyləmiş və bu işdə ona lazımi dəstək və yardım göstərəcəyini bildirmişdir.{nl}