{nl}

Mərkəzi Bankın yanında Maliyyə Monitorinqi Xidməti noyabrın 22-dən 25-dək ATƏT-in Bakı ofisi ilə birgə "Pulların yuyulmasına və terrorçuluğun maliyyələşdirilməsinə qarşı mübarizə: bank sektorunun öhdəlikləri" mövzusunda treninq-seminar keçirir.
Məqsəd bank mütəxəssislərinin praktiki bilik və bacarıqlarının artırılmasına dəstək verməkdir.
Seminarda Azərbaycanda fəaliyyət göstərən bankların pulların yuyulmasına və terrorçuluğun maliyyələşdirilməsinə qarşı mübarizə üzrə məsul şəxsləri iştirak edirlər. Seminarı bu sahənin beynəlxalq eksperti qismində ixtisaslaşmış Belçika təşkilatının nümayəndəsi aparır.
Beynəlxalq ekspertlə bərabər Maliyyə Monitorinqi Xidmətinin mütəxəssisləri də banklar tərəfindən məlumatların təqdim edilməsinin elektron sistemi, məsul şəxslərə dair peşəkar tələblər və digər mövzularda iştirakçılarla müzakirələr aparacaqlar.

AzərTAc