Noyabrın 12-də Azərbaycan Respublikası Dövlət Neft Fondunda Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsü (MHŞT) üzrə Çoxtərəfli Qrupun (ÇQ) iclası keçirilmişdir.
Fondun mətbuat xidmətindən bildirmişlər ki, Mədən Sənayesində Şəffaflığın Artırılması üzrə QHT Koalisiyası MHŞT üzrə 13-cü hesabat (2010-cu ilin ilk 6 ayı) - hökumətin hesabatı və Müstəqil Mühasiblərin Rəyi ilə bağlı rəyini açıqlamışdır.
İclasda ÇQ-nin üzvləri 2011-ci il üçün iş planını müzakirə edərək təsdiq etmişlər.
Tədbirdə qeyd edilmişdir ki, Azərbaycanda MHŞT-nin tətbiqinin ilkin mərhələsində bu prosesə inamın yaradılması məsələsindən irəli gələrək ildə iki (yarımillik və illik) hesabat açıqlanırdı. ÇQ mövcud şəraitdə Azərbaycanda MHŞT-nin tətbiqi sahəsində əldə edilən nailiyyətləri və MHŞT-ni tətbiq edən digər ölkələrdə yalnız illik hesabatların açıqlandığını nəzərə alaraq, bu hesabatların ildə bir dəfə - illik hesabat şəklində açıqlanmasına qərar vermişdir.
İclasda, həmçinin MHŞT-nin Azərbaycanda tətbiqinə dair digər məsələlər müzakirə olunmuşdur.
AzərTAc{nl}