ABŞ-ın Beynəlxalq İnkişaf Agentliyinin (USAİD) ölkə üzrə əlaqələndiricisi Kiif Simmonsun və İqtisadi İnkişaf Ofisinin rəhbəri xanım Şila Yanqın başçılıq etdiyi nümayəndə heyəti Azərbaycan Respublikasının Mərkəzi Bankı yanında Maliyyə Monitorinqi Xidmətində (MMX) olmuşlar.
Gorüşdə ikitərəfli əməkdaşlığın nəticələrinə dair qarşılıqlı fikir mübadiləsi aparılmışdır.
K.Simmons MMX-nin kollektivinə "Uğur sertifikatı"nı təqdim edərək bildirmişdir ki, xidmət bu mükafata pulların yuyulması və terrorizmin maliyyələşdirilməsinə qarşı mübarizə sahəsində səmərəli təlim proqramlarını həyata keçirdiyinə, beynəlxalq standartların tətbiqində qazandığı nailiyyətlərə görə layiq görülür.
MMX-nin direktoru Adışirin Qasımov qurumun işinə verilən yüksək qiymətə görə təşəkkürünü bildirərək demişdir ki, ölkəmizdə pulların yuyulmasına və terrorçuluğun maliyyələşdirilməsinə qarşı mübarizə sisteminin inkişafı istiqamətində tədbirlər ardıcıl xarakter daşıyır. Azərbaycan dövləti bu sahənin inkişafını ölkədə şəffaflığın artırılması, sabitliyin davamlı olaraq təmin edilməsi və təhlükəsizliyin gücləndirilməsinin vacib şərtlərindən biri kimi qəbul edir. Təsadüfi deyildir ki, beynəlxalq təşkilatlar pulların yuyulmasına və terrorçuluğun maliyyələşdirilməsinə qarşı mübarizə sahəsində ölkədə yüksək siyasi iradənin mövcudluğunu vurğulayırlar. Azərbaycanda pulların yuyulmasına və terrorçuluğun maliyyələşdirilməsinə qarşı mübarizə sahəsində beynəlxalq standartlara uyğun milli qanunvericilik bazası formalaşdırılaraq inkişaf etdirilir. Ölkəmiz qlobal çağırışlara qoşulmaqla mütəşəkkil cinayətkarlıq, pulların yuyulması və terrorçuluğun maliyyələşdirilməsi ilə mübarizədə müxtəlif ölkələr və beynəlxalq təşkilatlarla səmərəli əməkdaşlığa nail olmuşdur.
AzərTAc{nl}