Aprelin 17-də Rabitə və İnformasiya Texnologiyaları Nazirliyində (RİTN) 2010-cu ilin birinci rübünün yekunlarına həsr olunmuş kollegiya iclası keçirilmişdir.
Nazir Əli Abbasov qlobal maliyyə böhranına baxmayaraq, Azərbaycan iqtisadiyyatının stabil artımını, o cümlədən rabitə və informasiya texnologiyaları sektorunun inkişafını diqqətə çatdırmışdır. Bildirmişdir ki, cari ilin birinci rübündə informasiya-kommunikasiya texnologiyaları (İKT) və poçt sektorunda əldə olunan gəlirlərin məbləği 2009-cu ilin müvafiq dövrü ilə müqayisədə 23,1 faiz artaraq 241,8 milyon manat təşkil etmişdir. Artım tempi İKT sektorunda 23,4 faiz, o cümlədən telekommunikasiya sektorunda 22,2 faiz, poçt sektorunda isə 4,7 faiz təşkil etmişdir. İKT və poçt sektorunda əldə olunan gəlirlərin 80,2 faizi qeyri-dövlət rabitə müəssisələrinin payına düşmüşdür.
Nazir Dünya İqtisadi Forumunun informasiya texnologiyalarının inkişafına dair hesabatını və sənəddə Azərbaycanın artıq ikinci ildir ki, regionda lider ölkə kimi təqdim olunduğunu da vurğulamışdır.
Azərbaycanda İKT sektorunda həyata keçirilən layihələr barədə danışan Ə.Abbasov demişdir ki, Azərbaycanın ilk süni rabitə peykinin orbitə buraxılması layihəsi çərçivəsində raketdaşıyıcısının istehsalçısının müəyyənləşdirilməsi üzrə tenderin qalibi bu ilin ikinci yarısında məlum olacaqdır. Əsas istehsalçı şirkətlə müqavilə imzalandıqdan üç ay sonra raketdaşıyıcının istehsalçısı olacaq şirkət də müəyyən ediləcəkdir.
İclasda rübün yekunlarına dair məruzə dinlənilmiş, RİTN-in bir sıra birlik və müəssisələrinin rəhbərləri çıxış etmişlər.
Tədbirdə Əli Abbasov qurumun bir sıra əməkdaşına ölkədə rabitə və informasiya texnologiyaları sahəsinin inkişafında xidmətlərinə görə fəxri fərmanlar təqdim etmişdir.
AzərTAc{nl}