Azərbaycan Türk Sənayeçi və İş Adamları Beynəlxalq Cəmiyyətinin (TÜSİAB) idarə heyətinin yeni üzvləri sədr Yavuz Keleş başda olmaqla aprelin 16-da Fəxri Xiyabanda ümummilli lider Heydər Əliyevin məzarını ziyarət etmiş, dahi şəxsiyyətin əziz xatirəsini ehtiramla yad edərək, abidəsi önünə əklil qoymuşlar.
Görkəmli oftalmoloq alim, akademik Zərifə xanım Əliyevanın da məzarı üzərinə güllər düzülmüşdür. Sonra onlar Şəhidlər Xiyabanında Azərbaycanın müstəqilliyi və ərazi bütövlüyü uğrunda şəhid olmuş qəhrəman Vətən övladlarının məzarları üstünə güllər düzmüş, "Əbədi məşəl" abidəsinin və şəhid türk əsgərlərinin şərəfinə ucaldılmış abidənin önünə əklil qoymuşlar.
TÜSİAB-ın sədri Yavuz Keleş jurnalistlərə müsahibəsində bildirmişdir ki, TÜSİAB-a üzv olan şirkətlər Azərbaycana 3 milyarda yaxın sərmayə qoymuşlar. Əsas məqsədi Azərbaycanın iqtisadi inkişafına yönəlmiş TÜSİAB Azərbaycan və Türkiyə arasında iqtisadiyyatın müxtəlif sahələrində əlaqələrin gücləndirilməsində mühüm rol oynayır. Azərbaycanda türk iş adamları üçün münbit şərait yaradılmışdır. Bunun nəticəsidir ki, TÜSİAB 16 ildir iki qardaş ölkə olan Azərbaycan və Türkiyənin iqtisadi inkişafına dəyərli töhfələr verir.
AzərTAc