Özbəkistanın Baş naziri Şavqat Mirziyayev noyabrın 5-də Daşkənddə keçirilən Azərbaycan Respublikasının milli sərgisində olmuş, ölkəmizin iqtisadi inkişaf naziri Şahin Mustafayevlə birlikdə sərgiyə baxış keçirmişlər.
Əvvəl Baş nazir Heydər Əliyev Fondunun stendinə yaxınlaşmış, ona fondun gördüyü işlər haqqında məlumat verilmişdir. Sonra Şavqat Mirziyayev Azərbaycanda İxracın və İnvestisiyaların Təşviqi Fondu, Azərbaycan Dövlət Neft Şirkəti, milli musiqi alətləri, tətbiqi sənət nümunələri, həmçinin nəqliyyat infrastrukturu, turizm və digər sahələri əhatə edən stendlərə maraqla tamaşa etmişdir.
Sonra Baş nazir sərgi salonunun həyətində açıq havada maşınqayırma kompleksi və avtomobilqayırma sahələrinin məhsulları ilə də tanış olmuş, müvafiq strukturların nümayəndələrinə əməkdaşlıqla bağlı tapşırıqlar vermişdir.
Şavqat Mirziyayev demişdir: "Biz bir çox sahələrdə iş qurulması məqsədilə birgə müəssisələr yaratmağa hazırıq, təki istək olsun. Lazımdırsa, lap 20 birgə müəssisə yaradaq və onlara yaxından kömək edək".
Baş nazir əlaqələrin dərinləşdirilməsində hökumət strukturlarına və iş adamlarına uğurlar arzulamışdır.{nl}

Qulu KƏNGƏRLİ AzərTAc-ın xüsusi müxbiri
Daşkənd