Londonun "İCE" birjasının verdiyi məlumata görə, "Brent" markalı neftin bir barreli 30 dollardan da aşağı düşərək 29,96 dollar olub. Nyu-York Əmtəə birjasının verdiyi məlumata görə, Texas sortu adlandırılan ABŞ-ın "WTI" markalı neftinin bir barreli 29,71 dollar olub.

Neftin qiymətinin düşməsinə əsas səbəb Səudiyyə Ərəbistanının "Saudi Aramco" Neft Şirkətinin rəhbəri Xalid əl-Fatihin bəyanatı olub. O, bildirib ki, enerji layihələrinə qoyulan investisiya əvvəlki həcmdə qalacaq. Digər tərəfdən, Çin  iqtisadiyyatında yaranmış durğunluq neftin qiymətinin aşağı düşməsinə səbəb olub. Çin  2015-ci ildə 2014-cü ilə nisbətən dizel yanacağına istehlakı 5,6 faiz azaldıb.

“The Finansial Times”ın verdiyi məlumata görə, OPEK-in baş katibi Abdalla əl-Bədri təşkilata üzv ölkələrə bildirib ki, neftin indiki qiymətinə etiraz edilməlidir. Neftin qiyməti artmalıdır. İri neft istehsalçıları yaranmış problemin həllinə çalışmalıdırlar. Neftin qiymətinin artması nəinki istehsalçılara, həm də istehlakçılara lazımdır. Dünyaya çoxlu neft lazımdır, neftə isə böyük investisiya.

Qəzənfər  QASIMOV,
"Xalq  qəzeti"