Səudiyyə Ərəbistanı hökuməti neftin bir barrelinin qiymətinin 30 dollardan aşağı düşməsini "irrasional" hadisə adlandırıb. "Saidi Aramco" neft şirkətinin rəhbəri Xalid əl-Fatih bildirib ki, Ər-Riyad belə hesab edir ki, 2016-cı ildə neftin qiyməti artacaq.

Lakin neftin qiymətinin artıb-azalmasına baxmayaraq, Səudiyyə Ərəbistanı hasilatı azaltmayacaq. Əgər neftin qiyməti ən aşağı həddə belə düşsə, Səudiyyə Ərəbistanı bu vəziyyətə uzun müddət dözə bilər.

Səudiyyə Ərəbistanının neft naziri Əli ibn İbrahim ən-Nuyami 2014-cü ilin dekabrında bildirmişdi ki, neftin qiyməti 20 dollara ensə də, hasilat azalmayacaq.

bp şirkətinin baş direktoru Robert Dadli bildirib ki, neftin bir barreli 10 dollara da düşə bilər. Lakin bu vəziyyət uzun çəkməz.

 "BBC"nin verdiyi məlumata görə, Robert Dadlinin proqnozuna görə, neftin bir barrelinin qiyməti 2016-cı ilin ortalarında 30-40 dollar, ilin sonunda isə 50 dollar olacaq.

İsveçrənin Davos şəhərində keçirilən Dünya İqtisadi  Forumunda Robert Dadli bildirib ki, dünya  neft bazarında indiki vəziyyət ona 1986-cı ildəki neft böhranını xatırladır. O vaxt neftin bir barreli 10 dollara idi.

Londonun "İCE" birjasının verdiyi məlumata görə, hazırda "Brent" markalı neftin bir barreli 31,1 dollardır. Nyu-York Əmtəə birjasının verdiyi məlumata görə, Texas sortu adlandırılan ABŞ-ın "WTI" markalı neftinin bir barreli 30,23 dollardır.

Qəzənfər  QASIMOV,
"Xalq  qəzeti"