Noyabrın 5-də Daşkənddə Azərbaycan Respublikasının Milli Sərgisi açılacaqdır.
Ölkəmizin iqtisadi inkişaf naziri Şahin Mustafayevin başçılığı ilə Azərbaycan nümayəndə heyəti artıq Daşkənddədir. Nümayəndə heyətinə iqtisadi inkişaf nazirinin müavini Niyazi Səfərov, sənaye və energetika nazirinin müavini Natiq Abbasov, ölkəmizin Özbəkistandakı səfiri Namiq Abbasov və digər rəsmi şəxslər daxildirlər.
Milli Sərgidə yanacaq-energetika, inşaat, maşınqayırma, avtomobilqayırma, informasiya texnologiyaları, aqrosənaye, ekologiya, turizm, səhiyyə, təhsil, sosial təminat, idman, habelə idman strukturları, tarix, mədəniyyət və digər sahələri əhatə edən 160-dan artıq müəssisənin 1700-dən çox müxtəlif çeşiddə məhsulları nümayiş etdiriləcəkdir.
Sərgidə Heydər Əliyev Fondunun fəaliyyətini əks etdirən xüsusi stend də yaradılmışdır.
Sərgi çərçivəsində Şahin Mustafayevin Özbəkistanın Baş naziri Şavqat Mirziyayev və Baş nazirin müavini, xarici iqtisadi əlaqələr, investisiya və ticarət naziri Elyer Qəniyevlə görüşləri də nəzərdə tutulur. Bundan başqa, sahibkarlar arasında bir sıra işgüzar görüşlər keçiriləcək, bu sahələrdə əlaqələrin dərinləşdirilməsi məqsədilə müxtəlif sahələri əhatə edən sənədlər imzalanacaqdır.
Sərgi iştirakçılarına Azərbaycan haqqında kitab, jurnal və broşürlər, həmçinin mədəniyyət və tariximizlə bağlı müxtəlif disklərin paylanması da nəzərdə tutulur.

Qulu KƏNGƏRLİ AzərTAc-ın xüsusi müxbiri
Daşkənd