"VımpelKoma"nın baş direktoru və "TNK-BP"nin sabiq vitse-prezidenti Mixail Slobodin bildirib ki, 2016-cı ildə neftin bir barrelinin qiyməti 25 dollara düşə və il ərzində 25-40 dollar arasında satıla bilər.

Bu isə Çin iqtisadiyyatının gedişindən asılıdır. Əgər Çində iqtisadi vəziyyət gərginləşərsə, onda neftin qiyməti sürətlə aşağı enə bilər.

Qeyd edək ki, 2015-ci ilin əvvəllərində Mixail Slobodin bildirmişdi ki, neftin qiyməti 50 dollara olacaq. 2015-ci ilin ikinci yarısında isə 40 dollara və daha aşağı qiymətə enə bilər. Mixail Slobodinin bütün proqnozları özünü doğruldub. Onun bildirdiyinə görə, 2016-cı ildə neftin bir barreli 35-55 dollar arasında ola bilər. 2017-ci ildə isə neftin qiymətində bahalaşma olacaq və bir barreli 50-60 dollara satılacaq.

Britaniyanın "Standard Chartered" bankının təhlilçiləri isə bildiriblər ki, neftin qiyməti yaxın günlərdə daha 10 dollar ucuzlaşa bilər.

Londonun "İCE" birjasının verdiyi məlumata görə, hazırda "Brent" markalı neftin bir barreli 30,73 dollardır. Nyu-Yorkun əmtəə birjasının verdiyi məlumata görə, Texas sortu adlanan ABŞ-ın "WTI" markalı neftinin bir barreli 30,68 dollardır.

Neftin qiymətinin kəskin şəkildə aşağı düşməsi isə OPEK-i narahat edib. Bu səbəbdən OPEK təcili iclas çağırmaq istəyir.

Qəzənfər  QASIMOV,
"Xalq  qəzeti"