Səudiyyə Ərəbistanı öz avropalı müştəriləri üçün neftin qiymətini kəskin şəkildə aşağı endiriblər. Onlar bu addımı İran İslam Respublikasının dünya nefi bazarına çıxmasını çətinləşdirmək üçün etdiklərini bildiriblər.

"The Wall Street Journal"ın verdiyi məlumata görə, Səudiyyə Ərəbistanının "Aramco" Dövlət Neft Şirkəti şimal-qərb Avropa ölkələrinə neftin hər barrelində 60 sent endirim edib. Aralıq dənizi sahillərində yerləşən Avropa dövlətlərinə isə neftin hər barrelində 20 sent endirim edilib. Lakin Asiya ölkələrinə ixrac edilən neftin hər barrelini   60 sent artırıb. Ancaq ABŞ-a ixrac edilən neftin qiyməti dəyişməz qalıb.

Qeyd edək ki, dünya bazarında neftin qiyməti ucuzlahmaqda davam edir. Londonun "İCE" birjasının verdiyi məlumata görə, "Brent" markalı neftin bir barrelinin qiyməti əvvəlcə 33,21, 15 dəqiqədən sonra 33,50, bir saatdan sonra isə 33,08 dollar olub. Bir sutka ərzində "Brent" markalı neft 8 faiz ucuzlaşıb. Nyu-York əmtəə birjasının verdiyi məlumata görə, Texas sortu adlanan ABŞ-ın "WTI" markalı neftinin bir barreli də 5 faiz ucuzlaşaraq 33 dollardan aşağı düşüb. Ekspertlər neftin qiymətinin aşağı düşməsinə səbəbi Çinin Fond Birjasının çökməsi ilə əlaqələndirirlər. Çin Xalq Bankının verdiyi məlumata görə, Çin yuanı ABŞ dollarına nisbətdə 0,51 faiz aşağı düşüb və 1 dollar 6,5646 yuan olub. Bu, 2011-ci ilin aprelindən bəri ən aşağı göstəricidir.

Xatırladaq ki, 2004-cü ilin aprel ayından bəri neftin bir barrelinin qiyməti 34 dollardan aşağı düşməmişdi. Neftin qiymətinin kəskin şəkildə aşağı düşməsi neft ixrac edən ölkələrin milli valyutasına da ciddi təsir edib. Dollar isə möhkəmlənib.

Rusiya Prezidenti Vladimir Putin bildirib ki, neftin qiymətinin aşağı düşməsi ilə bağlı dövlət büdcəsinə yenidən baxılmalıdır.

Qəzənfər  QASIMOV,
"Xalq  qəzeti"