Rusiya Baş nazirinin müavini Arkadi Dvorkoviç neftin qiymətinin uzun müddət aşağı olacağına inanmır. “TASS”ın verdiyi məlumata görə, Arkadi Dvorkoviç belə hesab edir ki, neftin qiymətinin aşağı olması investisiyanı azaldır və öz növbəsində hasilatı aşağı salmağa məcbur edir. Baş nazirin müavini əmindir ki, son nəticədə neftin qiyməti artacaq.

Arkadi Dvorkoviç bildirib ki, neft istehsal və ixrac edən hər bir dövlət hələlik aşağı qiyməti saxlaya bilər. Lakin sonra investisiya aşağı düşəcək. Nəticədə isə hasilat və qiymət artacaq.

Qeyd edək ki, “Brent” markalı neftin bir barreli 2014-cü ilin iyun ayından indiyədək 70 faiz ucuzlaşıb. 2015-ci ilin dekabr ayında isə “Brent” markalı neftin bir barrelinin qiyməti 2004-cü ildəki minimuma enmişdi. “Brent” markalı neftin bir barrelinin qiyməti 2008-ci ildə ən aşağı qiymətə enərək 36,2 dollara satılmışdı.

Londonun “İCE” birjasının verdiyi məlumata görə, hazırda “Brent” markalı neftin bir barrelinin qiyməti 37,8 dollardır. Nyu-York Əmtəə Birjasının verdiyi məlumata görə, Texas sortu adlanan ABŞ-ın “WTI” markalı neftinin bir barreli 37,95 dollardır.

 Qəzənfər  QASIMOV,
“Xalq  qəzeti”