Türkiyə ilə İsrail arasında əlaqələr normallaşdıqdan sonra Türkiyə İsraildən qaz kəməri çəkməyi planlaşdırır və bu qaz kəməri Türkiyəni Rusiya qazından asılılığını aradan qaldıra bilər.

“Habarturk” qəzetinin verdiyi məlumata görə, Türkiyə ilə İsrail arasında qaz kəməri tikintisi barədə danışıqlar gedir. Qaz kəməri Aralıq dənizindən keçməklə olacaq. 2019-cu ildə hazır olacaq qaz kəmərinə hər il İsraildən 30 milyard kubmetr mavi yanacaq nəql ediləcək. Mavi yanacağın 10 milyard kubmetri Türkiyəyə, 20 milyard kubmetri isə Avropaya veriləcək.

İsrail qazının qiyməti hər min kubmetr üçün 199 dollar olacaq.

Bundan əlavə, İsraildən Aralıq dənizi vasitəsi ilə Türkiyənin Mersin liman şəhərinə 550 kilometr uzunluğunda qaz kəməri çəkiləcək. Bu qaz kəmərinin tikintisinə 2,5-3 milyard dollar vəsait ayrılacaq.

İsraildən başqa Türkiyə digər qaz ixrac edən ölkələrlə də danışıqlar aparır. Bu ilin dekabr ayında Türkiyə ilə Azərbaycan arasında bağlanmış müqaviləyə əsasən “TANAR” qaz kəməri tikintisi sürətlənəcək. Bu qaz kəməri Gürcüstandan keçməklə Türkiyəyə daxil olacaq və oradan da Bolqarıstan və Yunanıstana gedəcək. “TANAR” qaz kəmərinin istismarı 2018-ci il üçün nəzərdə tutulub.

Gələcəkdə isə “TANAP”a Türkmənistan və Yaxın Şərq ölkələri qoşulacaq.

Qəzənfər  QASIMOV,
“Xalq  qəzeti”