Oktyabrın 27-dən 29-dək Avstriyanın Zaltsburq şəhərində ənənəvi Kolumbus simpoziumu keçirilmişdir. Hər il təşkil edilən simpoziumun məqsədi Avstriya şirkətləri və potensial sərmayəçilərə sürətlə inkişaf etməkdə olan ölkələr və onların iqtisadiyyatı barədə təqdimatlar keçirmək, eləcə də investisiya imkanları barədə məlumat verməkdən ibarətdir.
Müxtəlif ölkələri təmsil edən məruzəçilər tədbirdə öz ölkələrinin infrastruktur, qida sənayesi, enerji və onun davamlı olaraq əldə edilmə yolları, təhsil və maliyyə sistemləri barədə təqdimatlarla çıxış etmişlər.
Builki simpoziumda diqqət mərkəzində dayanan ölkələrdən biri də Azərbaycan olmuşdur. Azərbaycanın Avstriyadakı səfirliyinin müşaviri Şamil Ələsgərov simpoziumda çıxış edərək, Azərbaycanın iqtisadi inkişafı barədə ümumi məlumat vermiş, qeyri-neft sektoruna göstərilən diqqət, ölkənin qoşulduğu regional layihələr və yerləşdiyi regionda iqtisadi cəhətdən ən güclü dövlətə çevrilməsi barədə danışmışdır.
Enerji Forumunda Azərbaycan Respublikası Dövlət Neft Şirkətinin Avstriyadakı nümayəndəliyinin direktoru Gülmirzə Cavadov "Azərbaycanın enerji strategiyası - neft və qaz sənayesinin inkişaf perspektivləri" mövzusunda məruzə ilə çıxış etmişdir. Neft sənayesinin qısa tarixi, keçdiyi inkişaf yolu və perspektivləri haqqında, həmçinin artıq uğurla həyata keçirilmiş və nəzərdə tutulan irimiqyaslı layihələr barədə məlumat vermişdir.

Elgün NİFTƏLİYEV, AzərTAc-ın xüsusi müxbiri
Vyana