Rusiya “Şimal axını-2” qaz kəmərinin tikintisini aktivləşdirib. “İnterfaks”ın verdiyi məlumata görə, Rusiyanın Avropa Birliyində olan  daimi nümayəndəsi Vladimir Çijov bildirib ki, “Şimal axını-2” qaz kəmərinin tikintisi ona görə aktivləşməyib ki, “Türkiyə axını” qaz kəməri dondurulub.

Bu layihə Rusiyanın “Qazprom” şirkəti ilə onun Qərbi Avropa həmkarları olan enerji şirkətlərinin razılığı əsasında həyata keçirilir.

Diplomat bildirib ki, “Şimal axını-2” qaz kəmərinin tikinti layihəsi  beynəlxalq əhəmiyyətli konsersiumdur.

Vladimir Çijov deyib ki, Slovakiyanın bu layihə  barədə narahatlığı düzgün deyil. Slovakiya və Ukrayna ərazisindən  keçən tranzit qaz kəməri sovet dövründə inşa edilib. Əlbəttə, bu qaz kəməri həm Ukrayna, həm də Slovakiyaya gəlir gətirirdi. Onlar bu gəlirdən məhrum olduqlarına görə “Şimal axını-2” layihəsinin əleyhinə çıxırlar.

Qeyd edək ki, “Şimal axını-2”  qaz kəmərinin tikintisi bu ilin sentyabr ayının 4-də Qərbi Avropanın ”E.O N", “Şhell”," BASF/ Wintershall", “OMV” və “Engie” enerji şirkətləri ilə bağlanmış müqaviləyə əsasən inşa edilir. “Şimal axını-2" qaz kəmərinin istismara verilməsi isə 2019-cu ilin IV rübünə planlaşdırılıb və hər il Qərbi Avropa ölkələrinə 55 milyard kubmetr mavi yanacaq nəql ediləcək.

 Qəzənfər  QASIMOV,
“Xalq  qəzeti”