“The Wall Street Journal”ın verdiyi məlumata görə, iqtisadi təhlilçilər, investorlar 2015-ci ilin ikinci yarısında neftin qiymətinin artmasını proqnozlaşdırmışdılar. Lakin dünya bazarında neft ucuzlaşmaqda davam edir. İndi isə iqtisadi təhlilçilər 2016-cı ilin sonuna kimi neftin qiymətinin artmasına ümidli deyillər. Bundan əlavə, dünyanın ən iri bankları belə hesab edirlər ki, 2016-cı ildə neftin qiyməti builkindən də ucuz ola bilər.

Nəşrin məlumatına görə, dünyada neft və neft məhsulları ehtiyatı artıb. Bu isə istər-istəməz, neft bazarına mənfi təsir göstərir. Hətta bəzi alıcılar neft bazarını tərk edirlər.

ABŞ hökuməti 2016-cı il üçün ABŞ neftinin bir barrelinin qiymətini 51,31 dollardan 50,89 dollara endirib. ABŞ-ın “Merrill Lynch” bankı isə 2016-cı il üçün neftin bir barrelinin qiymətini 53 dollardan 48 dollara endirib. Cari ildə Nyu-York əmtəə  birjasında neftin bir barrelinin orta illik qiyməti 49,6 dollar təşkil edib.

Hazırda isə “Brent” markalı neftin bir barrelinin qiyməti Londonun “İCE” birjasında 40,32 dollardır. Texas sortu adlanan ABŞ-ın “WN1” markalı nefti isə 37 dollardır. Ötən günə nisbətən neftin qiymətində az da olsa artım müşahidə olunub.

Qəzənfər  QASIMOV,
“Xalq  qəzeti”