Azərbaycan Respublikası Mərkəzi Bankı ölkədə makroiqtisadi sabitliyin və maliyyə stabilliyinin qorunmasına yönəldilmiş siyasəti davam etdirir.
2010-cu ilin ötən dövründə qlobal iqtisadi artımın tədricən bərpası, ölkənin tədiyə balansının profisitinin və valyuta ehtiyatlarının əhəmiyyətli artması, pul kütləsinin xarici və daxili mənbələrinin genişlənməsi müşahidə olunmuşdur. Beləliklə, qlobal iqtisadi böhranın milli iqtisadiyyata neqativ təsirlərinin aktiv dövrü geridə qalmışdır. Bu müddətdə ölkə iqtisadiyyatında artım prosesləri davam etmiş, məcmu tələbin fiskal və digər kanallarının tədricən genişlənməsi iqtisadi aktivliyi dəstəkləmişdir.
Mərkəzi Bankın mətbuat xidmətindən AzərTAc-a bildirmişlər ki, bu faktlar idarə heyətinin iclasında səsləndirilmişdir.
İclasda, həmçinin məlumat verilmişdir ki, 9 ayda başlıca makroiqtisadi indikatorların dinamikasını və gözlənilənləri nəzərə alaraq Azərbaycan Respublikası Mərkəzi Bankının idarə heyəti uçot dərəcəsini dəyişmiş, noyabrın 1-dən etibarən 3 faiz səviyyəsində müəyyən etmişdir. Pul kütləsinin artımının xarici monetar amillərinin tənzimlənməsi məqsədi ilə bank sektorunun xarici öhdəliklərinin 0,5 faiz səviyyəsində məcburi ehtiyata cəlb edilməsi də qərara alınmışdır.{nl}