Londonun "İCE" birjasının verdiyi məlumata görə, "Brent" markalı neftin bir barrelinin qiyməti 43 dollardan da aşağı düşərək 42,23 dollar olub. Texas nefti adlandırılan ABŞ-ın "WE1" markalı neftinin bir barrelinin  qiyməti isə 40 dollardan da aşağı düşüb. Bu, son dörd ayda neftin qiymətində ən aşağı məbləğdir və bu qiymətlər altı il əvvəl, 2009-cu ildə qeydə alınıb. Sonuncu dəfə "Brent" markalı neftin bir barrelinin maksimal  qiyməti noyabrın 25-də 46,5 dollar olub.

Mütəxəssislər neftin qiymətinin belə aşağı enməsində ABŞ-ı günahlandırırlar. Məhz ABŞ-ın neft ehtiyatları haqqında statistik cədvəl nəşr olunduqdan sonra dünya bazarında neftin qiyməti aşağı düşməyə başlayıb. Amerika Neft İnstitutunun verdiyi məlumata görə, son bir həftə ərzində ABŞ-ın neft ehtiyatları 1,6 miyon barrel də  artaraq 489,4 milyon barrelə çatıb.

Neftin qiymətinin aşağı düşməsi neft ixrac edən ölkələrin milli valyutalarına da ciddi təsir edib. ABŞ dolları isə möhkəmlənib.

Neft ixrac edən bir sıra ölkələrin neft nazirləri OPEK-ə etirazlarını bildiriblər. "The Wall Street Journal"ın yazdığına görə, neftin dünya bazarında ucuzlaşmasına görə Omanın neft naziri Məhəmməd bin Namad əl-Rumhi OPEK-ə öz etirazını bildirərək deyib ki, OPEK neft bazarını tənzimləyə bilmir.

Digər məlumatlara görə, dünya bazarında neftin ucuzlaşmasına əsas səbəb gizli  neft alverçiləridir. Onlar nefti qaçaqmalçılıq yolu ilə oğurlayaraq  ucuz qiymətə satırlar. Bu isə  dünya bazarında neftin qiymətinin aşağı düşməsinə səbəb olur.

Qəzənfər  QASIMOV,
“Xalq   qəzeti”