“Azneft” İstehsalat Birliyi “Abşeronneft” Neft və Qazçıxarma İdarəsinin istismar etdiyi “Qərbi Abşeron” yatağında hasilatın artırılması üçün yeni infrastruktur yaradılır.

Yaxın vaxtlarda yataqda daha bir özül istismara veriləcək. Artıq yeni özülün inşası tamamlanmaq üzrədir. Xatırladaq ki,  54 saylı stasionar dəniz özülünün sifarişçisi “Azneft” İstehsalat Birliyidir. SOCAR-ın “Neftqazelmitədqiqatlayihə’’ İnstitutunun layihəsi əsasında inşa edilən özülün podratçısı isə  “Neftqaztikinti” Trestidir.

“Qərbi Abşeron” yatağında 10 istismar quyusunun qazılması üçün nəzərdə tutulan özülün 4 dayaq bloku, 2 aralıq seksiyası “Zığ” istehsalat sahəsində, qalan 5 dayaq bloku və 7 ədəd aralıq seksiyası isə “BOS Şelf” MMC-də hazırlanmışdır. Blokların dənizə nəql edilərək layihə nöqtəsində quraşdırılması üçün hazırlıq işləri aparılır. Dənizdə tikinti-quraşdırma işlərinə cari ilin sonunda başlanılması gözlənilir. Özüldə 3480 kvadratmetrlik istehsalat və 600 kvadratmetrlik yaşayış sahələrinin quraşdırılması nəzərdə tutulur.

Yaşayış və istehsalat sahələri hər birinin uzunluğu 45 metr olan iki piyada körpüsü ilə birləşdiriləcək. Özül 7 yanalma və 4 minik meydançası, yaşayış bloku, müasir qazma qurğusu, avtomatik idarəetmə sistemi, bioloji təmizləmə qurğusu və digər zəruri avadanlıqlarla təchiz olunacaq. Yeni özüldə ətraf mühitin və əməyin mühafizəsi bütün müasir norma və tələblərə uyğun şəkildə təmin etdiriləcək. Dənizin 13,5 metr dərinliyində yerləşdiriləcək özüldən qazılacaq quyuların hər birindən isə sutkada 70 ton neft hasil ediləcəyi proqnozlaşdırılır.

Mirbağır YAQUBZADƏ,
“Xalq qəzeti”