Oktyabrın 27-də Azərbaycan-Çexiya biznes forumu keçirilmişdir. Tədbir Xəzər-Avropa İnteqrasiya İşgüzar Klubunun (CEIBC) Çexiya və Xəzər regionu şirkətlərinin iqtisadi əməkdaşlığının perspektivlərinə həsr olunmuş "dəyirmi masa" şəklində reallaşmışdır.
Çexiyanın Azərbaycandakı səfiri Radek Matula ölkəsinin Azərbaycanı vacib və perspektivli tərəfdaşlarından biri hesab etdiyini dilə gətirmişdir. Diplomat bildirmişdir ki, ölkələrimiz arasında bir çox sahələrdə əlaqələr mövcuddur, lakin bu əlaqələrin yeni mərhələyə keçirilməsi vacibdir. Azərbaycanlı investorlar üçün də Çexiya cəlbedici ola bilər. Belə ki, ölkədə avtomobil sənayesi, neft-kimya, əczaçılıq, aviasiya və digər sahələrə sərmayə qoymaq mümkündür. Çex şirkətləri də Azərbaycana böyük maraq göstərirlər. Onlar nəqliyyat, tikinti, suyun təmizlənməsi, bərpa olunan enerji resursları, maşınqayırma avadanlığının gətirilməsi və digər sahələrdə biznes qurmaq arzusundadırlar. Həmçinin bir neçə çex bankı da yuxarıda sadalanan sahələrə maliyyə dəstəyi göstərə bilər.
Ölkələrimiz arasında ticarət dövriyyəsində ən yüksək rəqəm (1,12 milyard avro) 2008-ci ildə qeydə alınmışdır. Hələlik Azərbaycandan idxal olunan məhsullar arasında neft ən yüksək yeri tutur. Azərbaycan nefti bu ölkəyə gətirilən qara qızılın 25 faizini təşkil edir.
Son 3 ildə Azərbaycana artıq 4-cü dəfədir ki, səfər etdiyini deyən Çexiyanın MDB ölkələri üzrə Ticarət-Sənaye Palatasının icraçı direktoru Frantişek Masopust da Azərbaycana olan marağın çoxaldığını söyləmişdir.
Xəzər-Avropa İnteqrasiya İşgüzar Klubunun prezidenti və baş icraçı direktoru Telman Əliyev qurum haqqında məlumat vermişdir.
Radek Matula CEIBC-nin fəxri üzvü seçilmişdir.
Görüşdə Azərbaycanın, Çexiyanın, Xəzər dənizi və Qara dəniz regionları ölkələrinin işgüzar dairəsinin nümayəndələri iştirak etmişlər.{nl}