Oktyabrın 27-də Bakıda "Azərbaycanın Ümumdünya Ticarət Təşkilatına (DTT) qoşulması: Beynəlxalq təcrübə" adlı konfrans keçirilmişdir.
Konfrans Avropa İttifaqının Azərbaycandakı nümayəndəliyi və Avropaya İnteqrasiya üzrə Azərbaycan Milli Komitəsi tərəfindən təşkil olunmuşdu.
Azərbaycan xarici işlər nazirinin müavini Mahmud Məmmədquliyev konfransın mühüm əhəmiyyət kəsb etdiyini vurğulamış, Azərbaycan iqtisadiyyatındakı inkişafın yeni mərhələyə daxil olduğunu bildirmişdir. Bu mərhələ iqtisadiyyatı modernləşdirməli, Avropa standartlarına uyğunlaşdırmalı və beləliklə, ölkəmizi inkişaf etmiş dövlətlər sırasına çıxarmalıdır. DTT-yə üzvlük bu baxımdan xüsusi önəm daşıyır. Bu istiqamətdə 20-dən artıq qanun və normativ akt beynəlxalq tələblərə uyğunlaşdırılmışdır.
Konfransda Azərbaycanın quruma üzvlüyü prosesinin hazırkı vəziyyəti barədə məlumat verilmişdir. Qeyd edilmişdir ki, hazırda respublikamız DTT-də müşahidəçi statusuna malikdir.
Konfransda, həmçinin DTT üzvlüyünün ticarətə, gömrük sisteminə, sosial-iqtisadi inkişafa, kiçik və orta sahibkarlığa edilən təsiri üzrə beynəlxalq təcrübələrə dair məruzələr dinlənilmişdir.
AzərTAc{nl}