Dünya bazarında neftin qiymətinin aşağı düşməsi nəticəsində Küveyt gəlirlərinin 60 faizini itirib. "TASS"ın verdiyi məlumata görə, bu barədə ölkənin Milli yığıncağın­da Küveyt əmiri IV Sabah məlumat verib. Onun sözlərinə görə, qısa müddət ərzində və təxirəsalınmaz şəraitdə ölkədə təcili iqtisadi islahatlar keçirilməli, mühüm qərarlar qəbul edilməlidir ki, dövlət büdcəsi təhlükəyə məruz qalmasın.

Qeyd edək ki, bu ilin iyul ayında Küveyt parlamenti gələn il üçün dövlət büdcəsini qəbul etdi. Son 16 ildə ilk dəfə olaraq büdcə kəsirlə qəbul edildi. Küveytin dövlət büdcəsi 7 milyard dinar ( 23,2 milyard dollar ) oldu.

Neftdən gələn gəlir Küveytin dövlət büdcəsinin 90 faizini təşkil edir. Lakin birdən-birə neftin qiymətinin aşağı enməsi büdcə gəlirini azaldıb. Mütəxəssislərin fikrincə, yaxın illərdə Küveyt valyuta ehtiyatları hesabına öz gəlirlərini düzəldə bilər. Küveytin valyuta ehtiyatları isə 548 milyard dollar təşkil edir.

Bundan əvvəl isə Beynəlxalq Valyuta Fon­du ( BVF ) bildirmişdi ki, neftin qiymətinin aşağı düşməsi son beş ildə böyük neft ixra­catçısı sayılan Səudiyyə Ərəbistanının dövlət büdcəsində kəsir yarada bilər.

Neftin qiymətinin aşağı düşməsi nəticəsində Yaxın Şərq ölkələri 360 milyard dollar itiriblər. Yeni şərtlərə görə, bu ölkələr xərcləmələri azaltmalı və ehtiyat fondundan qənaətlə istifadə etməlidirlər.

Qəzənfər QASIMOV,
"Xalq qəzeti"