Azərbaycan Dövlət İqtisad Universitetində (UNEC) həyata keçirilən dəyişikliklərin əsasını obyektivlik və şəffaflığın təmin edilməsi təşkil edir.

Bu baxımdan UNEC-də növbəti bir yeniliyə imza atılıb. Belə ki, Azərbaycan Dövlət İqtisad Universiteti Elmi Şurasının qərarına əsasən, universitetin 2014-cü il üzrə maliyyə hesabatlarının auditi həyata keçirilib. Audit dünyada böyük nüfuza malik olan “Ernst & Young” şirkəti tərəfindən aparılıb.

“Ernst & Young” Azərbaycan Dövlət İqtisad Universitetinin 2014-cü il üçün maliyyə vəziyyəti haqqında hesabatdan və həmin tarixdə başa çatan il üzrə maliyyə nəticələri haqqında hesabat, xalis aktivlərdə dəyişikliklər haqqında hesabat və pul vəsaitlərinin hərəkəti haqqında hesabat, habelə mühüm mühasibat uçotu prinsipləri və digər izaedici qeydlərin icmalından ibarət olan ilkin maliyyə hesabatlarının auditini aparıb. Audit beynəlxalq audit standartlarına uyğun olaraq həyata keçirilib.

Auditin nəticələrinə əsasən, Azərbaycan Dövlət İqtisad Universitetinin 2014-cü il üçün maliyyə hesabatlarına müsbət rəy verilib.

“Ernst & Young”ın yekun rəyində UNEC-in 31 dekabr 2014-cü il tarixinə və həmin tarixdə başa çatan il üzrə ilkin maliyyə hesabatlarının bütün əhəmiyyətli aspektlər baxımından “Büdcə Təşkilatları üçün Milli Mühasibat Uçotu Standartları”na tam uyğun hesabatlar olduğu bildirilir.

Elnarə ÖMƏROVA