SOCAR Azərbaycanda neft-qaz hasilatının sabit saxlanması istiqamətində tədbirləri davam etdirir. Şirkət bu məqsədlə Xəzərin Azərbaycan sektorunda işlədiyi yataqlarda hasilatın səmərəliliyinin artırılması, əməyin mühafizəsinin və təhlükəsiz iş şəraitinin təmin edilməsi üçün yeni estakada və meydançaların tikintisi ilə yanaşı, mövcud hidrotexniki qurğuların, dayaq bloklarının, estakadaların, estakadaüstü və estakadayanı meydançaların cari və əsaslı təmirini  prioritet istiqamət kimi daim diqqət mərkəzində saxlayır.

Tərtib olunmuş qrafikə uyğun olaraq “Azneft” İstehsalat Birliyi tərəfindən cari ilin son iki ayı ərzində N.Nərimanov adına Neft və Qazçıxarma İdarəsinin istismar etdiyi 13 estakadayanı meydança əsaslı təmir olunaraq istismara verilmişdir. Hazırda isə 187, 290 və 350 saylı estakadayanı meydançalarda son tamamlama işləri aparılır. Bundan əlavə, “28 May” Neft və Qazçıxarma İdarəsi üzrə 3, 5 və 11 saylı dərin dəniz özüllərinin döşəmə sahələri təmir edilmişdir. Bu yaxınlarda “Neft Daşları”ndakı yük körpüsü, 2223 saylı estakadayanı meydança və Avtonəqliyyat İdarəsinin yerləşdiyi meydançada əsaslı təmir işləri başa çatdırılmışdır. Ötən iki ayda “Azneft” İstehsalat Birliyinin “Abşeronneft” Neft və Qazçıxarma İdarəsində də infrastrukturun yeniləşdirilməsi istiqmətində mühüm tədbirlər həyata keçirilmişdir. Belə ki, idarənin  istismar etdiyi “Darvin bankası” yatağında yerləşən 340 saylı estakadayanı meydança əsaslı təmir olunmuş, 340 və 620 saylı dərin dəniz özüllərinin, eyni zamanda, “Abşeron bankası” yatağında yerləşən 11 saylı dərin dəniz özülünün döşəmə sahələri təmir edilərək Dövlət Qəbulu Komissiyasına təhvil verilmişdir.

Aparılmış təmir işləri çərçivəsində  korroziyaya uğrayan polad vərəqələr, fermalar dəyişdirilmiş, metal-konstruksiyalar yeniləri ilə əvəz olunmuş, dəmir-beton tavalar, metal məhəccərlər yenilənmişdir.

Mirbağır YAQUBZADƏ,
“Xalq qəzeti”