Hər bir ölkə, xüsusilə Azərbaycan kimi belə gözəl yerlərə,
təbii sərvətlərə malik olan bir ölkə mütləq turizmi inkişaf etdirməlidir.

İlham ƏLİYEV
Azərbaycan Respublikasının  Prezidenti

Azərbaycan artıq dünyada  turizm ölkəsi kimi

tanınmaqdadır. Cənab Prezident İlham Əliyev  ölkəmizdə turizmin inkişafını vacib istiqamətlərdən biri kimi diqqətdə saxlayır. 2011-ci ilin Azərbaycanda “Turizm ili” elan olunması  bu diqqətin ən bariz nümunəsi idi. Bu addım,

şübhəsiz ki, ölkəmizdə turizmin inkişafının yeni mərhələyə qalxmasına öz töhfəsini verdi.

Bu yaxınlarda  ölkə rəhbəri  “Qalaaltı Hotel & SPA” müalicə-istirahət kompleksinin açılışında iştirak etmiş və   komplekslə  yaxından  tanış olmuşdur.  Kompleksin   kollektivi ilə  görüşü  zamanı cənab Prezident  demişdir: “Hər bir ölkə, xüsusilə Azərbaycan kimi belə gözəl yerlərə, təbii sərvətlərə malik olan bir ölkə mütləq turizmi inkişaf etdirməlidir. Çünki bu, daimi gəlir mənbəyidir. Təbii sərvətlər, neft, qaz – bunlar tükənən sərvətlərdir. Ancaq ölkəmizin dayanıqlı inkişafı üçün daim gəlir gətirən sahələr mütləq inkişaf etməlidir. Onların içərisində turizm xüsusi yer tutur. Biz bəzi ölkələrin gəlirlərinə fikir versək görərik ki, ən çox gəlir gətirən sahə turizmdir.”

Azərbaycanın turizm sahəsi böyük perspektivlərə malikdir. Ölkəmizdə turizmin əksər növlərinin (kənd, müalicə-sağlamlıq, ekoloji, mədəni, sosial, kommersiya, idman, dini və s.) inkişafı üçün geniş imkanlar mövcuddur. Son illərdə əldə olunmuş sürətli sosial-iqtisadi tərəqqi bu sahənin hərtərəfli inkişafına yeni imkanlar açıb.

Ölkəmizdə  turizmin inkişafı üçün  mühüm  dövlət əhəmiyyətli layihələr həyata keçirilir. Qarşıya qoyulan əsas məqsədlər kifayət qədər genişdir: turizm ehtiyatlarının öyrənilməsi, genişləndirilməsi, turistlərin tələbatının ödənilməsi üçün zəruri xidmətlərin təşkili və müasir standartlara uyğunlaşdırılması, sanatoriya-kurort imkanlarının genişləndirilməsi, mehmanxanaların və digər turizm obyektlərinin sayının artırılması, turizm marşrutlarının çoxaldılması və s.  Başlıca hədəf  turizmin ölkə iqtisadiyyatının ən dayanıqlı, effektiv və rəqabətədavamlı sahəsinə çevrilməsidir.

Son vaxtlar bu istiqamətlərdə müsbət dinamika güclənməkdədir. Hər il Azərbaycanda 25-50 yeni mehmanxana, hotel, motel və digər turist yerləşdirmə obyektinin təməli qoyulur. Bundan başqa, iş adamlarında turizm sahəsinə böyük maraq yaranıb.

Azərbaycanın turizm sahəsində rəqabət imkanları çox yüksəkdir. Ölkəmizin təbii sərvətləri, iqlimi, zəngin mədəniyyəti və tarixi irsi cəlbedici turizm məhsulu yaratmaq üçün mühüm zəmindir. Azərbaycan turizm sənayesinin inkişafı üçün zəngin ehtiyatlara malikdir. Bu, hər şeydən əvvəl ölkəmizin çox əlverişli iqtisadi-coğrafi mövqeyə malik olması ilə bağlıdır. Azərbaycan iki dünya sivilizasiyasının qovuşuğunda – Trans-Qafqaz nəqliyyat dəhlizinin ortasında yerləşir. Bütün infrastruktur – Avropanı Qafqaz və Mərkəzi Asiya ölkələri ilə birləşdirən hava və dəniz daşımaları, magistral avtomobil və nəqliyyat yolları respublikamızın ərazisindən keçir.

Son 12 il ərzində Azərbaycanın turizm sektoru əsl investisiya “bum”u yaşayıb: mehmanxana potensialı xeyli artıb. Dövlətimizin  qayğısı  sayəsində  turizm inkişafımızın prioritet istiqamətlərindən birinə çevrilmişdir.  Bu sahədə  qəbul edilmiş dövlət  proqramları, davamlı olaraq həyata keçirilən tədbirlər  bu inkişafı sərtləndirən əsas amillərdəndir. Turizmin inkişafına dair Dövlət Proqramının həyata keçirilməsi nəticəsində turizmin inkişafı üçün münbit şərait yaradılmış, beynəlxalq turizm bazarına inteqrasiyanın təmin olunmasının əsası qoyulmuş, milli turizm kompleksinin rəqabətədavamlılığı yüksəlmişdir.

Son illər  turizm sahəsində normativ hüquqi baza və dövlət tənzimlənməsi mexanizmləri təkmilləşdirilmiş, turizm və rekreasiya zonalarında müvafiq infrastruktur yaradılmış, ölkənin turizm potensialından istifadə imkanları genişləndirilmiş, turizm sahəsinə yerli və xarici investisiyalar cəlb edilmiş,  turizmin müxtəlif növləri inkişaf etdirilmiş, yeni turizm marşrutları yaradılmış,  turizm sahəsi üçün kadr hazırlığı diqqət mərkəzində olmuşdur. Eyni  zamanda, Azərbaycanın milli-tarixi, mədəni və mənəvi irsinin, milli adət-ənənələrin dünyada təbliği, ayrı-ayrı regionların və şəhərlərin tarixini əks etdirən materialların nəşr etdirilməsi və yayılması, müasir informasiya və kommunikasiya texnologiyalarının tətbiq edilməsi   diqqət mərkəzində olmuşdur.   Qeyd etməliyik ki, xarici ölkələrlə  turizm əlaqələri qurulması istiqamətində  aparılan işlərin miqyası da xeyli genişlənmişdir. İkitərəfli və çoxtərəfli əməkdaşlıq   bu sahədə öz müsbət nəticələrini  verməkdədir. Çoxtərəfli əməkdaşlıq münasibətlərinin qurulması və inkişaf etdirilməsinin turizm siyasətinin prioritet istiqamətlərindən biri olduğunu nəzərə alaraq Mədəniyyət və Turizm Nazirliyi Ümumdünya Turizm Təşkilatı (BMÜTT), Avropa Şurası, İslam Konfransı Təşkilatı (İKT), Müstəqil Dövlətlər Birliyi (MDB), GUAM, Qara Dəniz İqtisadi Əməkdaşlıq Təşkilatı (QDİƏT), İqtisadi Əməkdaşlıq Təşkilatı (İƏT) və s. beynəlxalq təşkilatlar  turizm sahəsində əməkdaşlığın təşkil edilməsi, mövcud proqramlara qoşulma, beynəlxalq tədbirlərdə fəal iştirakın təmin edilməsi, həmçinin yeni təklif və layihələrin hazırlanması, əməkdaşlığa dair sənədlərin imzalanması istiqamətində mühüm fəaliyyətini davam etdirmişdir.

Azərbaycanın turizm imkanlarının xarici ölkələrdə təbliği məqsədilə Mədəniyyət və Turizm Nazirliyi tərəfindən  müxtəlif vaxtlarda İtaliyanın “Classis Assoiation”, “Italian Multimedia Group Sri” şirkətlərinin, Cənubi Koreyanın “Eduational Broadasting System” dövlət televiziya kanalının,  Almaniyanın media nümayəndələrinin, Rusiyanın “Kommersant FM” radiosunun və  Yaponiyanın  “Turistlərin cəlb olunmasına dair GUAM-ın vahid turizm məhsulu” layihəsi çərçivəsində bu ölkənin kütləvi informasiya vasitələri nümayəndələrinin ölkəmizə press-turları təşkil edilmişdir.   Azərbaycan  nümayəndə heyəti  tez-tez beynəlxalq turizm sərgilərində iştirak etmiş,  bu sərgilərdə ölkəmizin turizm potensialını əks etdirən   eksponatlar nümayiş olunmuşdur. Bakı şəhərində Azərbaycan Respublikası Mədəniyyət və Turizm Nazirliyinin rəsmi dəstəyi ilə ənənəvi olaraq “AITF” beynəlxalq turizm və səyahətlər sərgisi keçirilir.

Mədəniyyət və Turizm Nazirliyi tərəfindən Azərbaycanın turizm imkanlarının daha səmərəli təbliğatını həyata keçirmək məqsədilə 2014-2016-cı illər üçün marketinq strategiyası hazırlanmışdır.

Qalaaltıdakı  hotelin  kollektivilə  görüş zamanı cənab Prezident yeni  istifadəyə  verilmış turizm obyektləri barədə demişdir: “Son beş il ərzində “Şahdağ” Xizək Kompleksi yaradılıbdır. Orada artıq dörd gözəl otel fəaliyyət göstərir, bir otel tikilir. “Tufandağ” xizək mərkəzi yaradılıbdır. Onun ətrafında ona yaxın otel, beynəlxalq aeroport tikilibdir. Biz Naftalanın keçmiş şöhrətini bərpa edirik. Naftalan vaxtilə Ümumittifaq turizm mərkəzi idi. Bu gün biz bunu beynəlxalq turizm mərkəzinə çeviririk”.

Ölkəmizin  əksər  regionlarında yeni turizm obyektləri inşa olunur. Yeni müasir tipli  mehmanxanalar tikilir.     

Bu gün Azərbaycanın turizm marşrutları üzərində rayonlarda müxtəlif turist layihələri həyata keçirilir, həmin layihələr çərçivəsində bölgələrimiz beynəlxalq səviyyədə təbliğ olunur. Bu sırada “Böyük İpək yolu”, “Şərab yolu”, “Xalçaçılıq”, “Aleksandr Düma Qafqazda” və “Azərbaycanda alman məskənləri” layihələrini qeyd etmək olar. Sözügedən layihələr ölkəmizə gələn turistlərin sayının artırılmasına və çoxçeşidli turizm məhsulunun yaradılmasına xidmət edir.

Burada  bir məsələni də  vurğulamaq lazımdır. Belə ki,   son  vaxtlar  ölkəmizdə bir-birinin ardınca   keçirilən beynəlxalq  tədbirlər Azərbaycana turist axınını  xeyli artırmışdır. Bu yaxınlarda   Azərbaycanda keçirilən I Avropa Oyunları  turizmin inkişafına  güclü  stimul yaratmışdır.

Turizmin inkişafı üçün  Azərbaycan  zəngin  potensiala malikdir. Bunu  xarici olkələrin  mütəxəssisləri də  dəfələrlə   qeyd etmişlər. İndi əsas məsələ bu potensialdan  səmərəli  istifadə edərək ölkə iqtisadiyyatında  turizmin  payını artırmaqdır.

M. MÜKƏRRƏMOĞLU,
“Xalq qəzeti”