Cari il sentyabrın 1-nə Azərbaycan iqtisadiyyatına cəmi kredit qoyuluşları 8788,6 milyon manat təşkil etmişdir. Bu göstərici ötən ilin müvafiq dövrü ilə müqayisədə 15,2 faiz artmışdır. Kredit qoyuluşlarının 423,7 milyon manatı vaxtı keçmiş kreditlərin payına düşmüşdür.
Mərkəzi Bankın mətbuat xidmətindən AzərTAc-a bildirmişlər ki, hesabat dövründə verilmiş kreditlərin 29,8 faizi ev təsərrüfatlarının, 23,2 faizi ticarət və xidmət sahəsinin, 5 faizi nəqliyyat və rabitə sahəsinin, 7,3 faizi sənaye və istehsalın payına düşmüşdür.
Kreditlərin 12,3 faizi energetika, kimya və təbii ehtiyatlar sahəsinə, 4,7 faizi kənd təsərrüfatı və emalına, 7,3 faizi inşaat və əmlak sahəsinə, 0,6 faizi digər sahələrə yönəldilmişdir.
Kreditlərin 2445,8 milyon manatı qısamüddətli, 6342,7 milyon manatı isə uzunmüddətlidir. Qısamüddətli kreditlərinin 7,7 faizi, uzunmüddətli kreditlərin isə 3,7 faizi vaxtı keçmiş kreditlərdir.
Dövlət bankı tərəfindən iqtisadiyyata 3865,8 milyon manat, özəl banklar tərəfindən 4740,6 milyon manat, qeyri-bank kredit təşkilatları tərəfindən isə 182,2 milyon manat kredit qoyulmuşdur.
Kreditlərin 62,0 faizi manatla, 38,0 faizi xarici valyuta ilə verilmişdir.{nl}

AzərTAc