İyulun 29-da Sietlda (ABŞ, Vaşinqton ştatı) “Microsoft”un baş ofisində keçirilən “Imagine Cup 2015” müsabiqəsində Azərbaycan tələbələrinin layihəsi  mükafatçılar sırasına daxil olub.

Rabitə və Yüksək Texnologiyalar Nazirliyindən verilən xəbərdə deyilir ki, Azərbaycanın “NoObs” komandası ilk dəfə iştirak etdiyi beynəlxalq müsabiqədə ikinci yeri tutub.

“NoObs” müsabiqənin finalına “Spinal” adlanan kompleks həlli ilə çıxıb.

Məlumat üçün bildirək ki, “Spinal” qurğusu onurğa sütunun vəziyyətinə nəzarət edən ötürücü dəstindən ibarətdir. İnsan onurğa sütununa mənfi təsir göstərən vəziyyətdə oturduqda “Bluetooth” modulu vasitəsi ilə “Windows Phone” əməliyyat sistemi üzərində işləyən smartfona siqnallar daxil olur. Qeyd edək ki, “NoObs” 33 komanda arasından seçilib.

Müsabiqənin qalibləri tutduqları yerdən asılı olaraq 50 min, 10 min və 5 min dollar məbləğində pul mükafatı alacaqlar. Bundan başqa, “Microsoft” qaliblərə ABŞ-da startap-aksellerator təqdim edəcək.

“Microsoft Imagine Cup” müsabiqəsi yuxarı sinif şagirdləri və tələbələr üçün 2003-cü ildən etibarən keçirilir. Müsabiqə müxtəlif kateqoriyalar üzrə iki mərhələdə reallaşır.

Samirə ƏLİYEVA,
“Xalq qəzeti”