Nəsimi rayonunda 2015-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclas keçirilmişdir.

Tədbiri Nəsimi Rayon İcra Hakimiyyətinin başçısı Nəsib Məhəməliyev açaraq bildirdi ki, 2015-ci ilin birinci yarısı ölkəmizin iqtisadiyyatı üçün uğurlu olmuş və qarşıda duran vəzifələr yerinə yetirilmişdir. Bu dövrdə ölkəmizdə ümumi daxili məhsul 5,7 faiz artmış, 60 minə yaxın yeni iş yeri açılmışdır. 6 ayda ölkəmizə 12,7 milyard manat investisiya qoyulmuş, əhalinin pul gəlirləri 6,2 faiz yüksəlmişdir. İlin birinci yarısında sosial sahədə bütün proqramların icrası davam etdirilmişdir. Paytaxtımız Bakıda möhtəşəm I Avropa Oyunları keçirilmişdir.

Cari ilin birinci yarısında ölkəmizdə bütün sahələrdə dinamik inkişaf davam etmiş və yeni uğurlar əldə olunmuşdur. Bütün bunlar əsası ümummilli liderimiz Heydər Əliyev tərəfindən qoyulan və Azərbaycanın hərtərəfli inkişafına yönəlmiş müdrik siyasətin möhtərəm Prezidentimiz cənab İlham Əliyev tərəfindən uğurla davam etdirilməsinin bariz nümunəsidir.

Bu nailiyyətlərin qazanılmasında Nəsimi rayonu da öz layiqli tövhələrini vermişdir. 2015-ci ilin yanvar-iyun aylarında rayonda 275 milyon 883 min manatlıq sənaye məhsulu istehsal olunmuş və xidmətlər göstərilmişdir. Bu, keçən ilin eyni dövrü ilə müqayisədə 46,6 faiz çoxdur. Cari ilin 6 ayı ərzində rayonda 1682 yeni iş yeri açılmışdır. Nəsimi Rayon Əhalinin Sosial Müdafiəsi Mərkəzi tərəfindən 1027 ailəyə ünvanlı dövlət sosial yardımı verilmiş, mərkəzin əməkdaşları 316 nəfər ahıl və əlilə evlərdə sosial-məişət xidməti göstərmişlər.

Nəsimi Rayon İcra Hakimiyyəti başçısının müavini Anar Tağıyev məruzə ilə çıxış etdi. O bildirdi ki, ilin altı ayı ərzində rayonda istehlak bazarının dinamik inkişafı davam etmiş, əhaliyə 634 milyon manatlıq istehlak malları satılmış və pullu xidmətlər göstərilmişdir. Rabitə müəssisələri 31 milyon 973 min manatlıq, nəqliyyat müəssisələri isə 200 milyon 765 min manatlıq iş görmüş və xidmətlər göstərmişlər. Bu dövrdə tikinti-quraşdırma təşkilatları tərəfindən 208 milyon 669 min manat həcmində iş yerinə yetirilib ki, bu da keçən ilin birinci yarısı ilə nisbətdə iki dəfə çoxdur.

“2014-2016-cı illərdə Bakı şəhəri və onun qəsəbələrinin sosial-iqtisadi inkişafına dair Dövlət Proqramı”nın Nəsimi rayonu üzrə nəzərdə tutulan tədbirlərinin icrası uğurla həyata keçirilir. Heydər Əliyev adına İdman-Konsert Kompleksində əsaslı təmir işləri başa çatdırılmışdır. 1 saylı tam orta məktəbdə yeni idman zalının və 10 əlavə sinif otaqının inşasına başlanılmışdır. Texniki Humanitar Liseyin əsaslı təmirinə başlanılmış, 135 saylı körpələr evi-uşaq bağçasında isə əsaslı təmir işləri başa çatdırılmışdır.

İlin birinci yarısında Nəsimi Qaz İstismarı İdarəsi tərəfindən 1445 poqonometr qaz xətti çəkilmiş, 1378 ədəd mexaniki qaz sayğacı “Smart-kart” tipli sayğacla əvəz olunmuşdur. Bu dövrdə Nəsimi Rayon Enerji Təchizati və Satışı İdarəsi tərəfindən istehlak edilmiş elektrik enerjisi dəyərinin 100,51 faizi toplanmışdır. 73 ədəd transformator məntəqəsində avadanlıqlar təftiş edilmiş, 67 saylı transformator məntəqəsi əsaslı təmir olunmuşdur. Nəsimi Sukanal İdarəsi tərəfindən 1417 ədəd yeni su sayğacı quraşdırılmış, 2500 poqonometr müxtəlif diametrli su xətti, 480 poqonometr kanalizasiya xətti çəkilmişdir.

Ölkəmizin hər yerində olduğu kimi Nəsimi rayonunda da genişmiqyaslı abadlıq, yenidənqurma, yaşıllaşdırma işləri həyata keçirilir. 20 Yanvar küçısində 200 ədəd həmişəyaşıl ağac əkilmiş, həmin küçədəki 1 və 3 saylı binaların qarşısında 1200 kvadratmetr tamet daşları döşənmiş, 7 saylı binanın fasadaında 1200 kvadratmetr rənglənmə işi aparılmış, 660 kvadratmetr dam örtüyü təmir edilmişdir.  C.Səlimov küçəsindəki 7 saylı binanın dam örtüyü təmir olunmuş, 480 ədəd pəncərə yenisi ilə əvəz edilmiş, 7500 kvadratmetr fasad və eyvanlar təmir olunmuşdur. S.C.Pişəvəri küçəsində 4 min kvadratmetr asfalt örtüyü vurulmuş, 2 min poqonometr bardür dəyişdirilmiş, 500 kvadratmetr sahəyə qazon döşənmişdir. A.Mustafayev küçəsində 6 ünvanda binaların fasadlarında təmir, D.Əliyeva küçəsində 2 ünvanda binaların qarşısında abadlıq işləri görülmüşdür.

IDEA İctimai Birliyinin təşəbbüsü ilə keçirilən “Ümumrespublika yaşıllaşdırma” marafonu çərçivəsində mart ayında rayon ərazisində 2 mindən çox həmişəyaşıl ağac və gül kolları əkilmişdir.

Tbilisi prospektində Respublika Velotrekində yenidənqurma işləri yekunlaşmaq üzrədir. Hazırda Vaqif prospekti ilə X.Şuşinski küçələrinin kəsişməsində yerləşən parkda əsaslı təmir və yenidənqurma işləri aparılır. S.C.Pişəvəri küçəsində ümumi sahəsi 11 min 700 kvadratmetr olan “Yaşıl market”in tikintisi yekunlaşıb.

İclasda Nəsimi Rayon Mənzil Kommunal Təsərrüfatı Birliyinin rəisi Laçın Mustafayev, rayon sukanal idarəsinin rəisi İntiqam Kərimov və başqları çıxış etdilər. Onlar görülmüş işlərdən və qarşıda duran vəzifələrdən danışdılar.

Tədbirdə Nəsib Məhəməliyev Azərbaycan Respublikası Prezidentinin sərəncamı ilə təltif olunan rayon icra  hakimiyyətinin  əməkdaşı  Vəfa İsmayılovaya “Dövlət qulluğunda fərqlənməyə görə”  medalını  təqdim etdi.

Nəsimi Rayon İcra Hakimiyyətinin başçısı Nəsib Məhəməliyev iclasda yekun çıxışı etdi.

Tədbirdə Milli Məclisin deputatları Məlahət İbrahimqızı və Asim Mollazadə iştirak edirdilər.

Ayaz HƏMİDOĞLU,
“Xalq qəzeti”