Ölkəmizin neft-qaz sənayesində əhəmiyyətli yer tutan “Günəşli” yatağında infrastrukturun genişləndirilməsi istiqamətində tədbirlər davam etdirilir. Hazırda Dövlət Neft Şirkəti üzrə illik neftin yarısından çoxunun istehsal olunduğu bu yataqda hasilatın sabit saxlanması üçün müasir standartlara cavab verən stasionar dəniz özülləri inşa olunur, yeni-yeni quyular qazılır, köhnə quyularda cari və əsaslı təmir işləri aparılır.

Artıq  ‘’Azneft’’ İstehsalat Birliyinin sifarişi ilə ‘’Neftqazelmitədqiqatlayihə’’ İnstitutunun layihəsi əsasında “Günəşli’’ yatağında quraşdırılması nəzərdə tutulan  7 saylı dərin dəniz özülünün inşası başa çatmaq üzrədir. Xatırladaq ki, ”Neftqaztikinti" Tresti tərəfindən inşa olunan yeni özül 20 istismar quyusunun qazılması üçün nəzərdə tutulub. Artıq özülün dayaq bloku, daşıyıcı göyərtənin birinci və ikinci hissələri dənizə nəql olunaraq layihə nöqtəsində quraşdırılıb, 8650 ton svay vurulub. Hazırda özülün modullarının yığılması prosesinə hazırlıq görülür.

Göyərtədə quraşdırma işləri tam yekunlaşdıqdan sonra 16 ədəd modulun layihə nöqtəsində tikintisinə başlanılacaqdır. Bundan əlavə, layihə çərçivəsində ümumi uzunluğu 12 kilometr olan 9 neft-qaz boru xətti quraşdırılacaqdır. Eyni zamanda, elektrik enerjisi ilə təchizatın etibarlılığını təmin etmək məqsədilə özüldə dairəvi sistem üzrə 11 kilometr uzunluğunda sualtı kabel xəttinin çəkilməsi nəzərdə tutulur. Yeni özülün  cari ilin sonuna kimi istismara veriləcəyi gözlənilir.

Mirbağır YAQUBZADƏ,
“Xalq qəzeti”