Ölkəmizin enerji təminatında mühüm rol oynayan “Günəşli” yatağında hasilatın artırılması və quyu fondunun genişləndirilməsi işləri daim diqqət mərkəzində saxlanılır. Bunun nəticəsidir ki, hazırda “Azneft” İstehsalat Birliyi üzrə hasil olunan neftin və qazın yarısından çoxu məhz bu yatağın payına düşür.

Bu günlərdə “Azneft” İstehsalat Birliyinin sifarişi əsasında “Günəşli” yatağının dayaz sulu hissəsindəki 11 nömrəli dərin dəniz özülündən 344 nömrəli quyu qazmadan sonra istismara verilib. Xatırladaq ki, “Fasilə” Lay Dəstəsinə qazılan yeni quyu 3070-3034 metr intervaldan gündəlik 80 ton neft və 17 min kubmetr qaz hasilatı ilə istismar fonduna daxil edilib. Öz məhsuldarlığı ilə seçilən 344 nömrəli quyu fontan üsulu ilə istismar olunacaq. 

“Günəşli” yatağının dayaz sulu hissəsindəki 14 nömrəli dərin dəniz özülündəki 266 nömrəli quyu isə əsaslı təmirdən sonra istismara qaytarılıb. Quyu məhsuldar qat çöküntülərinin IX horizontundan 2740-2695 metr intervaldan gündəlik 65 ton neft hasilatı ilə istismara daxil edilib.

Xatırladaq ki, hər iki quyuda istismar işləri “Azneft” İstehsalat Birliyinin “28 May” NQÇİ tərəfindən həyata keçirilir.

M. YAQUBZADƏ,
“Xalq qəzeti”