“Şahdəniz-2” və Cənubi Qafqaz boru kəmərinin genişləndirilməsi layihələrinin icrası sürətlə davam etdirilir. Hər iki layihənin icrasına başlanmasından ötən müddətdə Azərbaycanda və Gürcüstanda yerləşən bütün quraşdırma və tikinti sahələrində mühüm irəliləyişlər əldə olunub.

Bu yaxınlarda “Şahdəniz-2” layihəsinin reallaşdırılması istiqamətində daha bir uğura imza atılıb. Söhbət layihə çərçivəsində nəzərdə tutulmuş işləri vaxtında yerinə yetrimək üçün imzalanan növbəti iki müqavilədən gedir.  Xatırladaq ki, həmin müqavilələr 2018-ci ildə ilk qaz əldə edildikdən sonra yatağın gələcək cinah hissələrinin işlənməsinə dəstək olmaq üçündür. Bu müqavilələrin imzalanması layihənin həyata keçirilməsi qrafikini dəstəkləyir və bu iri işlənmə layihəsinin bütün  sahələrində əldə edilmiş irəliləyişə daha bir əlavədir.

“Şahdəniz-2” layihəsi üzrə bundan əvvəl elan edilmiş əsas müqavilələrin davamı olan həmin sənədlərdən biri sualtı hasilat sistemi avadanlıqlarının təchizatı məsələlərini əhatə edir. Dəyəri 297 milyon dollar olan bu müqavilə “FMC Kongsberg Subsea AS” şirkəti ilə imzalanıb. Həmin müqavilə çərçivəsindəki işlərin həcminə sualtı manifoldlardan, əlaqədar idarəetmə bloklarından və birləşdirici avadanlıqlardan ibarət 3, 4 və 5 saylı hasilat kompleksləri üçün avadanlığın təchizatı daxildir. Avadanlıqların təchizatı 2016-cı ildən 2021-ci ilədək mərhələlərlə həyata keçiriləcək.

Digər müqavilə isə yatağın tammiqyaslı işlənməsi üçün tələb olunan sualtı fontan armaturlarının və köməkçi vasitələrin planlaşdırılan üç partiyasından ikincisinin təchizatı üçün imzalanıb. “OneSubsea (UK) Ltd” şirkəti ilə imzalanmış həmin müqavilənin dəyəri isə 66 milyon dollar təşkil edir. Xatırladaq ki, avadanlıqların təchizatı 2016-cı ildən 2021-ci ilədək mərhələli şəkildə reallaşdırılacaq.

Mirbağır YAQUBZADƏ,
“Xalq qəzeti”