Cari  ilin beş ayı ərzində ölkə sənayesinin təsərrüfat subyektləri tərəfindən 10,8 milyard manatlıq məhsul istehsal olunub. İstehsalın həcmi ötən ilin müvafiq dövrünün səviyyəsini qeyri-neft sahələrində 12,4 faiz, neft-qaz sektorunda isə 1,4 faiz üstələyib.

Dövlət Statistika Komitəsinin yaydığı məlumatda bildirilir ki, sənaye məhsulunun 63,5 faizinin istehsal olunduğu mədənçıxarma bölməsində 17,6 milyon ton neft, 8,5 milyard kubmetr əmtəəlik təbii qaz və digər məhsullar hasil edilib.

Emal bölməsində istehsalın həcmi ümumi məhsulun 28  faizini təşkil edib. Qida, kağız və karton, poliqrafiya, neft məhsullarının, habelə kimya sənayesi məhsullarının, rezin və plastmas məmulatlarının və digər məhsulların istehsalında artım müşahidə edilib.

İstehsal edilmiş sənaye məhsulunun 7,7 faizi elektrik enerjisi, qaz, buxar istehsalı və təchizatı bölməsinin, 0,8 faizi su təchizatı, tullantıların təmizlənməsi və emalı sahəsinin payına düşür.

Ümumi sənaye məhsulu istehsalının 88,4 faizi malların, 11,6 faizi isə sənaye xarakterli xidmətlərin payına düşüb. Məhsulun 76,3 faizi özəl bölmədə istehsal olunub.

Sadalanan uğurlu göstəricilər deməyə əsas verir ki, dövlət başçımızın sənayeləşmə siyasətinə uyğun olaraq, cari ilin ötən aylarında  ölkəmizdə çoxşaxəli, innovativ iqtisadiyyatın formalaşdırılması, sənayenin inkişafının sürətləndirilməsi istiqamətində tədbirlər uğurla həyata keçirilib. Qarşıdakı dövrdə də  Azərbaycanda müasir standartlara cavab verən, rəqabətqabiliyyətli və ixracyönümlü məhsullar istehsal edən sənaye müəssisələrinin yaradılması, müsbət nəticələr əldə edilməsi  şübhəsizdir.

Vaqif BAYRAMOV,
“Xalq qəzeti”